Прэзідэнты Беларусі і Венесуэлы Аляксандр Лукашэнка і Уга Чавес 16 сакавіка пабывалі на пляцоўцы жылога комплексу, які будуецца ў горадзе Маракай.

Маракай знаходзіцца на поўначы Венесуэлы за 80 км ад Каракаса. Гэта важны індустрыяльны цэнтр Венесуэлы, дзе размешчаны прадпрыемствы тэкстыльнай, папяровай, тытунёвай прамысловасці. Акрамя таго, гэта цэнтр сельскагаспадарчага рэгіёну, які вырошчвае какаву, каву і тытунь.

Кіраўнікі дзяржаў заклалі памятны камень на месцы будучай забудовы.

Прэзідэнтам прадставілі праекты перспектыўных будаўнічых аб'ектаў. Аляксандр Лукашэнка і Уга Чавес азнаёміліся з ужо рэалізуемымі сумеснымі беларуска-венесуэльскімі праектамі. Кіраўнікі дзяржаў цёпла гутарылі з мясцовымі жыхарамі, беларускімі і венесуэльскімі будаўнікамі, якія працуюць тут, агледзелі адведзеную пад будаўніцтва жылля пляцоўку. Добрым падарункам венесуэльскім фермерам сталі 200 трактароў "Беларус", што ім перадаў Прэзідэнт Уга Чавес.

Галоўнай тэмай у час наведвання Маракая стала жыллёвае будаўніцтва і рэалізацыя сацыяльных праектаў у Венесуэле. Так, кіраўнікі дзяржаў дамовіліся аб тым, каб у гэтым годзе спраектаваць, а з 1 студзеня 2011 года пачаць будаўніцтва на тэрыторыі базы ваенна-паветраных сіл Венесуэлы ў Маракаі. Тэрыторыя самой базы будзе значна зменшана, а свабодныя землі забудаваны жыллём, найперш для венесуэльскіх ваеннаслужачых. Акрамя таго, Уга Чавес папрасіў аб тым, каб беларускія будаўнікі падключыліся да праектаў рэканструкцыі гарадскіх кварталаў у Маракаі.

Аляксандр Лукашэнка зрабіў сустрэчную прапанову: акрамя рэалізацыі жыллёвага праекта пабудаваць па існуючых у Беларусі ўзорах перапрацоўчыя прадпрыемствы (малаказаводы, мясакамбінаты). Усе неабходныя пытанні былі вырашаны тут жа, непасрэдна на месцы будучай будоўлі. Адпаведныя задачы пастаўлены перад губернатарамі Маракая і Мінскай вобласці, а таксама перад іншымі службовымі асобамі. У хуткім часе ў Беларусь прыедзе дэлегацыя гэтага рэгіёну для азнаямлення з беларускім вопытам жыллёвага і прамысловага будаўніцтва.

Прэзідэнт Беларусі лічыць, што беларусам не трэба распыляць свае сілы і брацца за ажыццяўленне праектаў па ўсёй Венесуэле. На яго думку, у сферы будаўніцтва неабходна сканцэнтравацца на рэалізацыі трох асноўных: узвядзенні раёна ў Каракасе, будаўніцтве жылля ў Маракаі і Барынасе.

Кіраўнікі дзяржаў дамовіліся, што прадоўжаць размову 17 сакавіка.