Прэзідэнт Рэспублікі Беларусь Аляксандр Лукашэнка і Прэзідэнт Баліварыянскай Рэспублікі Венесуэла Уга Чавес у ходзе маючага адбыцца рабочага візіту венесуэльскага лідара ў Беларусь абмяркуюць бягучы стан і перспектывы развіцця супрацоўніцтва паміж дзвюма дзяржавамі ў розных сферах.

На 16 кастрычніка запланаваны перагаворы лідараў дзвюх краін у вузкім і пашыраным складзе, па выніках якіх плануецца падпісаць шэраг двухбаковых дакументаў.

У ходзе візіту Уга Чавес таксама наведае культурна-спартыўны комплекс "Мінск-арэна" і Нацыянальную бібліятэку Беларусі. Акрамя таго, увазе высокага госця будзе прадстаўлена экспазіцыя нафтагазавага абсталявання, якое выпускаецца ў рэспубліцы. Прэзідэнт Венесуэлы азнаёміцца з работай і магчымасцямі будаўнічай галіны Беларусі, наведае адну з будпляцовак у Мінску.

Яшчэ ў 2006 годзе прэзідэнты дамовіліся аб рэгулярных кантактах на вышэйшым узроўні для надання дадатковай дынамікі развіццю супрацоўніцтва паміж дзвюма краінамі. На гэты раз Аляксандр Лукашэнка і Уга Чавес плануюць абмеркаваць шырокі спектр пытанняў двухбаковых адносін, у тым ліку супрацоўніцтва ў нафтахімічнай сферы, рэалізацыю планаў па прамысловай кааперацыі прадпрыемстваў, узаемадзеянне ў будаўнічай і сельскагаспадарчай галінах, нарошчванне гандлёва-эканамічнага і пашырэнне гуманітарнага супрацоўніцтва паміж Беларуссю і Венесуэлай, а таксама актуальныя пытанні міжнароднага парадку дня.