Прэзідэнт Рэспублікі Беларусь 23 кастрычніка падпісаў Указ № 519, якім унесены змяненні і дапаўненні ў некаторыя ўказы па пытаннях страхавання. Дакументам устанаўліваюцца нормы, накіраваныя на максімальную абарону правоў і інтарэсаў страхавальнікаў.

Так, будзе дэбюракратызавана працэдура ўрэгулявання страт страхавальнікаў па абавязковых відах страхавання шляхам рэалізацыі прынцыпу аднаго акна. Прадугледжваецца скарачэнне тэрмінаў выканання страхавымі арганізацыямі працэдур, звязаных з урэгуляваннем страт па абавязковых відах страхавання, у тым ліку шляхам увядзення магчымасці афармлення дарожна-транспартнага здарэння без удзелу супрацоўнікаў ДАІ МУС пры нанясенні шкоды транспартнаму сродку ў памеры да 200 еўра (па аналогіі са страхавым заканадаўствам, што дзейнічае ў Расійскай Федэрацыі). Акрамя таго, пацярпелы ў выніку страхавога выпадку па абавязковаму страхаванню грамадзянскай адказнасці ўладальнікаў транспартных сродкаў можа звярнуцца не толькі ў страхавую арганізацыю, якая заключыла дагавор страхавання з прычыніцелем шкоды, але і да страхоўшчыка, які заключыў такі дагавор з пацярпелым. Уводзіцца таксама магчымасць урэгулявання ўсіх адносін з пацярпелым, звязаная з аглядам транспартных сродкаў, у момант яго звароту да страхоўшчыка. Выплаты страхавой кампенсацыі будуць рабіцца таксама на падставе дакумента, выдадзенага органамі ДАІ МУС пацярпеламу на месцы ДТЗ, без наступнага звароту страхоўшчыка з запытамі ў гэтыя органы.

Уводзіцца абавязак аб поўным пакрыцці страхоўшчыкам страт пацярпелага ў выніку страхавога выпадку па абавязковаму страхаванню грамадзянскай адказнасці ўладальнікаў транспартных сродкаў пры гібелі транспартнага сродку. У адпаведнасці з дзеючым заканадаўствам страхоўшчык не даплачвае страхавую кампенсацыю пацярпеламу ў выпадку гібелі яго транспартнага сродку на суму дэталяў, прыгодных для далейшага выкарыстання, выклікаючы справядлівыя нараканні грамадзян наконт гэтага.

Указам устанаўліваецца магчымасць заключэння дагавора комплекснага ўнутранага страхавання. У адпаведнасці з умовамі гэтага дагавора страхавальнік можа застрахаваць адначасова не толькі адказнасць на выпадак нанясення шкоды іншаму ўдзельніку дарожнага руху, але і свой транспартны сродак у рамках аднаго дагавора. На гэты дагавор распаўсюджваюцца ўмовы абавязковага страхавання грамадзянскай адказнасці ўладальнікаў транспартных сродкаў, прадугледжаныя Палажэннем аб страхавой дзейнасці, зацверджаным Указам Прэзідэнта ад 25 жніўня 2006 года нумар 530.

У адпаведнасці з Указам не будзе праводзіцца выплата страхавой кампенсацыі па абавязковаму страхаванню ад няшчасных выпадкаў на вытворчасці і прафесійных захворванняў у выпадку пашкоджання здароўя застрахаванай асобы ў сувязі са знаходжаннем яе ў стане алкагольнага ап’янення або пад уздзеяннем наркатычных або таксічных рэчываў.

Указам удасканальваецца парадак правядзення абавязковага страхавання з дзяржаўнай падтрымкай ураджаю сельскагаспадарчых культур, жывёлы і птушкі. Прадугледжваецца магчымасць выплаты часткі страхавога ўзносу за страхавальніка іншай асобай, калі на момант заключэння дагавора абавязковага страхавання страхавальнік недастаткова плацежаздольны. Таксама значна паляпшаюцца ўмовы атрымання страхавой кампенсацыі сельскагаспадарчымі арганізацыямі.

Тэкст Указа глядзіце, калі ласка, у рускай версіі на Партале Прэзідэнта Рэспублікі Беларусь