У кожнай вобласці Беларусі неабходна ствараць навучальныя ўстановы для адораных дзяцей па ўзоры Лужаснянскай школы-інтэрната-гімназіі для здольных і таленавітых дзяцей Віцебскай вобласці. Такую задачу паставіў 10 ліпеня Прэзідэнт Беларусі Аляксандр Лукашэнка ў час рабочай паездкі ў Віцебскую вобласць.

Кіраўнік дзяржавы наведаў школу-інтэрнат-гімназію для здольных і таленавітых дзяцей у Лужасне, дзе навучаюцца і выхоўваюцца дзеці, адабраныя сюды з усёй вобласці. У асноўным усе вучні з сельскай мясцовасці, 40 працэнтаў дзяцей - з малазабяспечаных сем'яў, 24 працэнты - дзеці-сіроты.

Лужаснянская школа-інтэрнат-гімназія з'яўляецца шматпрофільнай навучальнай установай. Тут даецца не толькі якасная адукацыя, але і добрая магчымасць творчага і фізічнага развіцця. Прыём вучняў вядзецца праз сістэму ўступных іспытаў. Сёння тут навучаюцца 275 вучняў. За 15 гадоў існавання навучальнай установы было падрыхтавана 1047 пераможцаў раённых, 340 абласных, 195 рэспубліканскіх і 14 міжнародных прадметных алімпіяд. Акрамя таго, 156 гімназістаў узнагароджаны прэміяй спецыяльнага фонду Прэзідэнта Беларусі па сацыяльнай падтрымцы адораных вучняў і студэнтаў. Гімназія цесна ўзаемадзейнічае з многімі вышэйшымі навучальнымі ўстановамі рэспублікі, практычна 100 працэнтаў дзяцей, якія скончылі гэту навучальную ўстанову, паступаюць у ВНУ.

На думку Прэзідэнта, вопыт па навучанні таленавітых дзяцей з сельскай мясцовасці, як гэта робіцца ў Лужасне, неабходна распаўсюджваць на ўсю рэспубліку.
"Калі ёсць запатрабаванасць, то трэба адбіраць таленавітых дзяцей, ствараць у кожнай вобласці такія добрыя "астраўкі ведаў" і даваць дзецям адпаведную адукацыю", - сказаў Кіраўнік дзяржавы.

Ён падкрэсліў, што неабходна на самых ранніх стадыях развіцця асобы "вычляняць і падтрымліваць таленавітых дзяцей, каб яны не згубіліся ў жыцці". "Гэта - аснова дзяржавы. Тады будзе і прамысловасць, і сельская гаспадарка, і спорт, і турызм, калі мы падтрымаем гэтых дзяцей", - сказаў Аляксандр Лукашэнка.

Як падкрэсліў Міністр адукацыі Аляксандр Радзькоў, у рэспубліцы ёсць магчымасці для ажыццяўлення гэтай ідэі. Такія навучальныя ўстановы можна ствараць на базе ўжо існуючых з укараненнем тэхналогій і методык падобна да тых, якія прымяняюцца ў Лужаснянскай школе-інтэрнаце-гімназіі. На думку міністра, гэта навучальная ўстанова - канкрэтны прыклад рэалізацыі прэзідэнцкіх праграм "Дзеці Беларусі" і "Маладыя таленты Беларусі".

Аляксандр Лукашэнка азнаёміўся з тым, як вядзецца навучальны і выхаваўчы працэс у школе, у якіх умовах жывуць і навучаюцца юныя таленты, пабываў у навучальных аўдыторыях, жылых пакоях, спартыўнай і трэнажорнай залах, басейне, футбольным полі. З нагоды прыезду Прэзідэнта вучні арганізавалі невялікі імправізаваны канцэрт.

Пазней Аляксандр Лукашэнка разам з юнымі выхаванцамі ў двары гімназіі пасадзіў яліну.

Прэзідэнт з цеплынёй паразмаўляў з вучнямі гімназіі. Юнакі і дзяўчаты пацікавіліся ў кіраўніка дзяржавы, ці марыў ён у іх узросце аб тым, каб стаць Прэзідэнтам, а таксама якімі якасцямі неабходна валодаць, каб заняць такую высокую дзяржаўную пасаду. Аляксандр Лукашэнка адзначыў, што неабходна быць "чалавекам ад зямлі". "Трэба адчуваць людзей: і дзяцей, і дарослых, і селяніна, і рабочага, а самае галоўнае - каб народ цябе адчуваў", - сказаў Кіраўнік дзяржавы.

На развітанне Аляксандр Лукашэнка перадаў у дар выхаванцам школы-інтэрната-гімназіі новы аўтобус.

Увечары Кіраўнік дзяржавы, як і ў папярэднія гады, прыме ўдзел у цырымоніі адкрыцця XVIII Міжнароднага фестывалю мастацтваў "Славянскі базар у Віцебску".