Канстытуцыйнаму суду Беларусі трэба больш актыўна вырашаць пытанні адпаведнасці Асноўнаму закону краіны выдаваемых нарматыўных прававых актаў і аднаўляць вяршэнства права. Аб гэтым сёння заявіў Прэзідэнт Беларусі Аляксандр Лукашэнка, прыводзячы да прысягі суддзю КС Тадэвуша Варановіча.

"Патэнцыял Канстытуцыйнага суда павінен выкарыстоўвацца яшчэ больш эфектыўна", - сказаў Кіраўнік дзяржавы. Пры гэтым Прэзідэнт падкрэсліў неабходнасць таго, каб суддзі дзейнічалі ў рамках сваёй кампетэнцыі, а прынятыя імі рашэнні і заключэнні выклікалі давер.

"Перакананы, што ўсе задачы, якія стаяць перад Канстытуцыйным судом, пад сілу цяперашняму судзейскаму корпусу. У яго склад увайшлі высокапрафесійныя юрысты, якія карыстаюцца заслужанай павагай у нашай дзяржаве, - адзначыў Аляксандр Лукашэнка. - Думаю, што вы, Тадэвуш Валянцінавіч, - дастойнае папаўненне гэтых радоў. Багаты вопыт работы на розных пасадах у судах агульнай юрысдыкцыі, несумненна, стане сур'ёзнай падмогай на новым полі дзейнасці".

Кіраўнік дзяржавы пажадаў новаму суддзі поспехаў у рабоце, шчасця, здароўя і дабрабыту. У азнаменаванне сённяшняй падзеі Прэзідэнт уручыў Тадэвушу Варановічу пасведчанне суддзі КС і падарачны экзэмпляр Канстытуцыі Беларусі.

Варановіч Тадэвуш Валянцінавіч нарадзіўся ў 1956 годзе ў Мядзельскім раёне. У 1981 годзе скончыў БДУ. З 1984 года працаваў у Віцебскім абласным судзе, у 1995 - стаў яго старшынёй. У чэрвені 2009 года быў выбраны Саветам Рэспублікі на пасаду суддзі Канстытуцыйнага суда Беларусі.