Аб ільготным спажывецкім крэдытаванні


У мэтах узмацнення дзяржаўнай падтрымкі малазабяспечаных грамадзян Рэспублікі Беларусь пастанаўляю:

1. Прапанаваць адкрытым акцыянерным таварыствам "Ашчадны банк "Беларусбанк", "Белаграпрамбанк", "Беларускі банк развіцця і рэканструкцыі "Белінвестбанк", "Белпрамбудбанк" (далей - банкі) у 2009 - 2010 гадах прадастаўляць малазабяспечаным грамадзянам* ільготныя крэдыты на спажывецкія патрэбы на ўмовах, прадугледжаных у пункце 2 гэтага Указа, для набыцця ў гандлёвых арганізацыях тавараў па пераліку, што вызначаецца Саветам Міністраў Рэспублікі Беларусь (далей - ільготныя крэдыты).

2. Устанавіць, што:

2.1. ільготныя крэдыты прадастаўляюцца банкамі ва ўстаноўленым заканадаўствам парадку ў беларускіх рублях тэрмінам да трох гадоў з выплатай дзесяці працэнтаў гадавых за карыстанне крэдытам;

2.2. агульная сума льготных крэдытаў, што выдаюцца банкамі аднаму атрымальніку ў перыяд, вызначаны ў пункце 1 гэтага Указа, не можа перасягнуць 300 базавых велічынь, устаноўленых на дату заключэння крэдытнага дагавора любым з банкаў;

2.3. прадастаўленне льготных крэдытаў ажыццяўляецца ў безнаяўным парадку шляхам пералічэння банкамі грашовых сродкаў на бягучыя (разліковыя) рахункі гандлёвых арганізацый у аплату разліковых дакументаў, прадстаўленых крэдытаатрымальнікам.

3. Кампенсацыя банкам страт па льготных крэдытах ажыццяўляецца за кошт сродкаў рэспубліканскага бюджэту, прадугледжаных на іншыя пытанні ў галіне прамысловасці, будаўніцтва і архітэктуры, у памеры розніцы паміж 1,5-кратнай стаўкай рэфінансавання Нацыянальнага банка, устаноўленай на дату разліку кампенсацыі, і працэнтнай стаўкай, вызначанай у падпункце 2.1 пункта 2 гэтага Указа.

4. Савету Міністраў Рэспублікі Беларусь:

зацвердзіць пералік тавараў, для набыцця якіх малазабяспечаным грамадзянам прадастаўляюцца льготныя крэдыты;

пры ўдакладненні паказчыкаў рэспубліканскага бюджэту на 2009 год і фарміраванні праектаў рэспубліканскага бюджэту на 2010 - 2013 гады прадугледжваць сродкі на кампенсацыю страт банкаў па льготных крэдытах;

прыняць іншыя меры па рэалізацыі гэтага Указа.

5. Кантроль за выкананнем гэтага Указа ўскласці на Камітэт дзяржаўнага кантролю.

6. Гэты Указ уступае ў сілу праз адзін месяц пасля яго афіцыйнага апублікавання, за выключэннем пункта 4 і гэтага пункта, якія ўступаюць у сілу пасля афіцыйнага апублікавання гэтага Указа.

_________________
* Для мэт гэтага Указа пад малазабяспечанымі грамадзянамі разумеюцца грамадзяне, у якіх сярэднямесячны сукупны даход на кожнага члена сям'і, вылічаны за тры месяцы, што папярэднічаюць месяцу заключэння крэдытнага дагавора, не перасягае трохразовага сярэднямесячнага сярэднедушавога мінімальнага спажывецкага бюджэту сям'і з чатырох чалавек, устаноўленага на дату заключэння гэтага дагавора.

Прэзідэнт Рэспублікі Беларусь А.Лукашэнка