Малазабяспечаным грамадзянам у Беларусі будуць прадастаўляцца крэдыты тэрмінам да трох гадоў з выплатай 10 працэнтаў гадавых на спажывецкія патрэбы для набыцця тавараў працяглага карыстання. Адпаведны ўказ нумар 371 "Аб ільготным спажывецкім крэдытаванні" 6 ліпеня падпісаў Прэзідэнт Беларусі Аляксандр Лукашэнка.

Дакумент выдадзены ў мэтах узмацнення дзяржаўнай падтрымкі малазабяспечаных грамадзян Беларусі.

Указам прадугледжана прадастаўленне ў 2009-2010 гадах малазабяспечаным грамадзянам крэдытаў на спажывецкія патрэбы для набыцця нехарчовых груп тавараў працяглага карыстання. Функцыі па выдачы такіх крэдытаў ускладаюцца на ААТ "Ашчадны банк "Беларусбанк", "Белаграпрамбанк", "Белінвестбанк" і "Белпрамбудбанк". Крэдыты будуць выдавацца ў беларускіх рублях тэрмінам да трох гадоў з выплатай 10 працэнтаў гадавых за карыстанне імі.

Права на атрыманне льготных спажывецкіх крэдытаў будуць мець грамадзяне, у якіх сярэднямесячны сукупны даход на кожнага члена сям'і, вылічаны за тры месяцы, што папярэднічаюць месяцу заключэння крэдытнага дагавора, не перасягае трохразовага сярэднямесячнага сярэднедушавога мінімальнага спажывецкага бюджэту сям'і з чатырох чалавек (цяпер Br1130,8 тыс.).

Дзяржава за кошт сродкаў рэспубліканскага бюджэту возьме на сябе нагрузку ў выглядзе кампенсацыі страт банкаў ад выдачы льготных крэдытаў.

Прыняцце ўказа дасць магчымасць аказаць дадатковую дзяржаўную падтрымку малазабяспечаным слаям насельніцтва, што з'яўляецца яшчэ адным рэальным дзеяннем, накіраваным на ўмацаванне сацыяльнай абароненасці жыхароў нашай краіны.

Указ уступае ў сілу праз адзін месяц пасля афіцыйнага апублікавання, за выключэннем асобных яго пунктаў.