Беларусь зацікаўлена ўдзельнічаць і ў Мытным саюзе з Расіяй і Казахстанам, і ў зоне свабоднага гандлю з ЕС. Аб гэтым заявіў Прэзідэнт Беларусі Аляксандр Лукашэнка сёння ў час інтэрв'ю аўстрыйскай газеце Die Presse.
"Для нас прыярытэт - гэта час. Мы ніколі не адмовімся ад Мытнага саюза, таму што нам гэта выгадна. Але мы не адмовіліся б ад зоны свабоднага гандлю з ЕС, калі б нам заўтра яе прапанавалі, і мы маглі б гэтым скарыстацца", - падкрэсліў Аляксандр Лукашэнка.
Прэзідэнт дадаў: "Для нас прыярытэт тое, што мы раней можам рэалізаваць. Калі з 2010 года рэальна пачне дзейнічаць Мытны саюз - гэта і будзе нашым прыярытэтам. Будзе зона свабоднага гандлю ў Беларусі, Украіны з Еўрасаюзам ці не - мы яшчэ гэтага не ведаем. Гэта пакуль што размовы. Вельмі добра, калі мы створым Мытны саюз з Казахстанам і Расіяй, гэта будзе нам выгадна. Калі гэта атрымаецца, мы і СГА будзем разам рухацца. І, зразумела, будзе вельмі выгадна, калі мы ўтворым зону свабоднага гандлю з ЕС".
У час інтэрв'ю Аляксандру Лукашэнку было зададзена больш за 20 пытанняў, якія датычыліся інтарэсаў Беларусі ва "Усходнім партнёрстве", узаемаадносін рэспублікі з Расійскай Федэрацыяй, выбудоўвання ўзаемадзеяння з Еўрапейскім саюзам, працэсаў прыватызацыі ў краіне, а таксама іншых актуальных тэм. |
