Кіраўнік дзяржавы Аляксандр Лукашэнка 25 чэрвеня падпісаў Указ № 331 "Аб унясенні дапаўненняў і змяненняў ва Указ Прэзідэнта Рэспублікі Беларусь ад 28 красавіка 2006 года № 277".

Дакумент прыняты ў мэтах удасканалення парадку ажыццяўлення дзейнасці на рынку каштоўных папер. Указам вызначаецца парадак устанаўлення цэнтральным дэпазітарыем каштоўных папер у Рэспубліцы Беларусь карэспандэнцкіх адносін з дэпазітарыем каштоўных папер замежнай дзяржавы.

Такія адносіны будуць афармляцца дагаворам аб аказанні паслуг па ўліку правоў на каштоўныя паперы паміж цэнтральным дэпазітарыем і дэпазітарыем-нерэзідэнтам па ўзгадненню з рэспубліканскім органам дзяржаўнага кіравання, які ажыццяўляе дзяржаўнае рэгуляванне рынку каштоўных папер, у парадку і на ўмовах, вызначаных гэтым органам.

Устанаўленне карэспандэнцкіх адносін цэнтральным дэпазітарыем з дэпазітарыямі-нерэзідэнтамі дасць магчымасць стварыць спрыяльныя ўмовы для выхаду каштоўных папер беларускіх эмітэнтаў на замежныя фондавыя рынкі.

Указам змяняюцца патрабаванні да мінімальнага памеру ўласнага капіталу (чыстых актываў) юрыдычных асоб, якія маюць права ажыццяўляць дэпазітарную дзейнасць.

Разлік мінімальнага памеру ўласнага капіталу будзе ажыццяўляцца не ў замежнай валюце (еўра), а ў базавых велічынях, што не дасць магчымасці ваганню валютнага курсу паўплываць на стабільнасць функцыянавання дэпазітарнай сістэмы. Аналагічны падыход будзе прымяняцца да вызначэння кошту чыстых актываў юрыдычных асоб, якія маюць права ажыццяўляць эмісію біржавых аблігацый.

У мэтах лібералізацыі ўмоў ажыццяўлення эканамічнай дзейнасці на рынку каштоўных папер указам здымаюцца асобныя абмежаванні, устаноўленыя для дэпазітарыяў рэспублікі заканадаўствам.

Прадугледжваецца, што юрыдычныя асобы, якія ажыццяўляюць дэпазітарную дзейнасць, могуць мець ва ўласнасці каштоўныя паперы, якія прадастаўляюць ім у выпадках, устаноўленых заканадаўствам, права на кіраванне акцыянерным таварыствам. Акрамя таго, пры наяўнасці адпаведнага спецыяльнага дазволу (ліцэнзіі) ім прадастаўлена права ажыццяўляць дзейнасць па давернаму кіраванню каштоўнымі паперамі (акцыямі) эмітэнта, з якім заключаны дагавор на дэпазітарнае абслугоўванне эмітэнта, а ў выпадку адчужэння каштоўных папер дэпанентам - аказваць паслугі дэпаненту па заключэнню праз гандлёвую сістэму адкрытага акцыянернага таварыства "Беларуская валютна-фондавая біржа" здзелак куплі-продажу акцый эмітэнта, з якім заключаны дагавор на яго дэпазітарнае абслугоўванне.

У мэтах аховы звестак, якія змяшчаюцца ў рэестры ўладальнікаў каштоўных папер, на юрыдычных асоб, якія з'яўляюцца эмітэнтамі акцый, у парадку і на ўмовах, што вызначаюцца рэспубліканскім органам дзяржаўнага кіравання, ажыццяўляючым дзяржаўнае рэгуляванне рынку каштоўных папер, ускладаецца абавязак распрацоўкі і зацвярджэння рэгламенту работы з гэтым рэестрам.

Наяўнасць у эмітэнта акцый рэгламенту работы з рэестрам уладальнікаў каштоўных папер значна зменшыць рызыку нядобрасумленнага выкарыстання інфармацыі, якая змяшчаецца ў гэтым рэестры, і павысіць эканамічную бяспеку акцыянерных таварыстваў, якія ажыццяўляюць дзейнасць на тэрыторыі рэспублікі.

Указам канкрэтызаваны пералік каштоўных папер, якія могуць выступаць прадметам залогу па аблігацыях.

Прадугледжваецца, што прадметам залогу па аблігацыях могуць быць каштоўныя паперы трэціх асоб - дзяржаўныя каштоўныя паперы (за выключэннем імянных прыватызацыйных чэкаў "Маёмасць"), каштоўныя паперы Нацыянальнага банка, аблігацыі мясцовых выканаўчых і распарадчых органаў, закладныя, дэпазітныя сертыфікаты, аблігацыі банкаў і (або) нерухомая маёмасць.

Гэта мера накіравана таксама на абарону правоў і законных інтарэсаў інвестараў, паколькі ў якасці забеспячэння выканання абавязацельстваў па аблігацыях змогуць выступаць высокаліквідныя і забяспечаныя каштоўныя паперы з найменшым узроўнем рызыкі неплацяжоў па іх.

У мэтах стварэння спрыяльных умоў для самастойнага прыцягнення інвестыцыйных рэсурсаў мясцовым выканаўчым і распарадчым органам прадастаўляецца магчымасць ажыццяўляць эмісію аблігацый без іх забеспячэння, паколькі фактычным пазычальнікам у гэтым выпадку выступае дзяржава, інтарэсы якой мясцовыя выканаўчыя і распарадчыя органы прадстаўляюць.

Акрамя таго, прыбытак, атрыманы ад пагашэння і рэалізацыі аблігацый мясцовых пазык, але не вышэйшы за іх бягучы кошт на дзень продажу (за выключэннем брокерскіх і іншых пасрэдніцкіх аперацый), будзе вызваляцца ад абкладання падаткамі на даходы і прыбытак, а таксама падаходным падаткам.

Тэкст Указа глядзіце, калі ласка, у рускай версіі на Партале Прэзідэнта Рэспублікі Беларусь