Жыхарам Гродзенскай вобласці

Дарагія сябры!

Прыміце самыя шчырыя віншаванні ў сувязі з 65-годдзем утварэння Гродзенскай вобласці.

Заснаваная ў ваенным 1944 годзе вобласць прайшла вялікі шлях. У кароткія тэрміны жыхары змаглі аднавіць разбураную народную гаспадарку, узняць з руін гарады і вёскі.

Самаадданая праца гараджан і сельскіх жыхароў ператварыла Прынёманскі край у адзін з перадавых, паспяховых, сацыяльна стабільных рэгіёнаў з высокімі паказчыкамі эканамічнага развіцця, багатым інтэлектуальным і кадравым патэнцыялам.

Перадавыя пазіцыі займае вобласць і ў сельскагаспадарчай вытворчасці. За вопытам атрымання рэкордных ураджаяў, надояў і прыбаўленняў у вазе сюды едуць аграрыі ўсёй рэспублікі.

На Гродзеншчыне ўражальнымі тэмпамі вядзецца будаўніцтва жылля, добраўпарадкоўваюцца населеныя пункты, рэстаўрыруюцца гістарычныя помнікі. Вобласць вызначаецца навуковымі, культурнымі і спартыўнымі дасягненнямі. Тут паслядоўна рэалізуюцца ўсе прынятыя сацыяльныя праграмы, што дае падставу з упэўненасцю глядзець у будучыню.

Поспехі працаўнікоў Прынёманскага краю - гэта вынік іх працавітасці, прафесіяналізму, творчасці і энергіі.

Жадаю жыхарам Гродзеншчыны моцнага здароўя, шчасця і новых поспехаў на карысць любімай Айчыны.

Аляксандр Лукашэнка