Аб некаторых мерах дзяржаўнай падтрымкі малога прадпрымальніцтва

У мэтах далейшага развіцця малога прадпрымальніцтва і павышэння эфектыўнасці аказання яму дзяржаўнай падтрымкі:

1. Устанавіць, што да суб’ектаў малога прадпрымальніцтва адносяцца:

індывідуальныя прадпрымальнікі, зарэгістраваныя ў Рэспубліцы Беларусь;

мікраарганізацыі - зарэгістраваныя ў Рэспубліцы Беларусь камерцыйныя арганізацыі з сярэдняй колькасцю работнікаў за каляндарны год да 15 чалавек уключна;

малыя арганізацыі - зарэгістраваныя ў Рэспубліцы Беларусь камерцыйныя арганізацыі з сярэдняй колькасцю работнікаў за каляндарны год ад 16 да 100 чалавек уключна.

Сярэдняя колькасць работнікаў суб’ектаў малога прадпрымальніцтва вызначаецца ў парадку, прадугледжаным у частках трэцяй і чацвёртай пункта 4 Палажэння аб аказанні дзяржаўнай фінансавай падтрымкі суб’ектам малога прадпрымальніцтва і суб’ектам інфраструктуры падтрымкі малога прадпрымальніцтва за кошт сродкаў, прадугледжаных у праграмах дзяржаўнай падтрымкі малога прадпрымальніцтва, што зацвярджаецца гэтым Указам.

Спецыяльнай рэгістрацыі індывідуальных прадпрымальнікаў і юрыдычных асоб у якасці суб'ектаў малога прадпрымальніцтва або іншага пацвярджэння названага статусу з боку дзяржаўных органаў не патрабуецца.

2. Дзяржаўная фінансавая падтрымка за кошт сродкаў, прадугледжаных у праграмах дзяржаўнай падтрымкі малога прадпрымальніцтва, аказваецца:

2.1. суб’ектам малога прадпрымальніцтва шляхам прадастаўлення:

2.1.1. Беларускім фондам фінансавай падтрымкі прадпрымальнікаў:

фінансавых сродкаў на аплатнай або бязвыплатнай аснове;

маёмасці на ўмовах лізінгу (фінансавай арэнды);

гарантый па льготных крэдытах, што выдаюцца банкамі Рэспублікі Беларусь у адпаведнасці з падпунктам 2.1.3 гэтага пункта;

2.1.2. аблвыканкамамі і Мінскім гарвыканкамам:

фінансавых сродкаў на зваротнай аплатнай або бязвыплатнай аснове;

субсідый для пакрыцця часткі працэнтаў за карыстанне банкаўскімі крэдытамі;

субсідый для пакрыцця расходаў на выплату лізінгавых плацяжоў па дагаворах лізінгу (фінансавай арэнды) у частцы аплаты сумы ўзнагароджання (даходу) лізінгадаўца;

субсідый для пакрыцця часткі расходаў, звязаных з удзелам у выставачна-кірмашовых мерапрыемствах або з іх арганізацыяй;

2.1.3. банкамі Рэспублікі Беларусь ільготных крэдытаў за кошт сродкаў мясцовых бюджэтаў, прадугледжаных праграмамі дзяржаўнай падтрымкі малога прадпрымальніцтва і размешчаных ва ўклады (дэпазіты) гэтых банкаў;

2.2. суб’ектам інфраструктуры падтрымкі малога прадпрымальніцтва (цэнтрам падтрымкі прадпрымальніцтва, інкубатарам малога прадпрымальніцтва) шляхам прадастаўлення субсідый аблвыканкамамі і Мінскім гарвыканкамам.

3. Фінансаванне мерапрыемстваў праграм дзяржаўнай падтрымкі малога прадпрымальніцтва (правядзенне конкурсаў, выданне метадычных дапаможнікаў, развіццё інфармацыйных рэсурсаў і іншыя мерапрыемствы), якія не адносяцца да дзяржаўнай фінансавай падтрымкі, названай у пункце 2 гэтага Указа, ажыццяўляецца за кошт сродкаў рэспубліканскага бюджэту Міністэрствам эканомікі, мясцовых бюджэтаў - аблвыканкамамі і Мінскім гарвыканкамам у адпаведнасці з заканадаўствам аб дзяржаўных закупках.

4. Зацвердзіць прыкладзенае Палажэнне аб аказанні дзяржаўнай фінансавай падтрымкі суб'ектам малога прадпрымальніцтва і суб’ектам інфраструктуры падтрымкі малога прадпрымальніцтва за кошт сродкаў, прадугледжаных у праграмах дзяржаўнай падтрымкі малога прадпрымальніцтва.

5. Прызнаць страціўшымі сілу:

Указ Прэзідэнта Рэспублікі Беларусь ад 19 ліпеня 1996 г. нумар 262 "Аб дзяржаўнай падтрымцы малога прадпрымальніцтва" (Збор указаў Прэзідэнта і пастаноў Кабінета Міністраў Рэспублікі Беларусь, 1996 г., нумар 21, арт. 514);

пункт 2 Указа Прэзідэнта Рэспублікі Беларусь ад 23 красавіка 1999 г. нумар 231 "Аб Зборніку дзеючых нарматыўных актаў Прэзідэнта Рэспублікі Беларусь (1994 - 1998)" (Нацыянальны рэестр прававых актаў Рэспублікі Беларусь, 1999 г., нумар 33, 1/291) у частцы зацвярджэння рэдакцыйна-тэхнічных змяненняў, унесеных ва Указ Прэзідэнта Рэспублікі Беларусь ад 19 ліпеня 1996 г. нумар 262;

пункт 2 дадатка да Указа Прэзідэнта Рэспублікі Беларусь ад 26 жніўня 2008 г. нумар 445 "Аб некаторых пытанняў органаў дзяржаўнай статыстыкі" (Нацыянальны рэестр прававых актаў Рэспублікі Беларусь, 2008 г., нумар 210, 1/9972).

6. Савету Міністраў Рэспублікі Беларусь:

пачынаючы з 2010 года распрацоўваць і зацвярджаць тэрмінам на 3 гады праграмы дзяржаўнай падтрымкі малога прадпрымальніцтва;

штогод у праекце рэспубліканскага бюджэту прадугледжваць расходы на фінансаванне праграм дзяржаўнай падтрымкі малога прадпрымальніцтва ў адпаведнасці з гэтым Указам;

у шасцімесячны тэрмін забяспечыць прывядзенне актаў заканадаўства ў адпаведнасць з гэтым Указам і прыняць іншыя меры па яго рэалізацыі.

7. Аблвыканкамам і Мінскаму гарвыканкаму:

пачынаючы з 2010 года забяспечыць распрацоўку і зацвярджэнне тэрмінам на 3 гады рэгіянальных праграм дзяржаўнай падтрымкі малога прадпрымальніцтва;

у двухмесячны тэрмін распрацаваць і зацвердзіць парадак правядзення конкурсаў інвестыцыйных праектаў суб’ектаў малога прадпрымальніцтва для іх фінансавання за кошт сродкаў, прадугледжаных у рэгіянальных праграмах дзяржаўнай падтрымкі малога прадпрымальніцтва.

8. Абласным і Мінскаму гарадскому Саветам дэпутатаў распрацаваць і зацвердзіць палажэнні аб аказанні дзяржаўнай фінансавай падтрымкі суб’ектам малога прадпрымальніцтва і суб’ектам інфраструктуры падтрымкі малога прадпрымальніцтва за кошт сродкаў, прадугледжаных у рэгіянальных праграмах дзяржаўнай падтрымкі малога прадпрымальніцтва, у адпаведнасці з гэтым Указам.

9. Дзеянне гэтага Указа не распаўсюджваецца на рашэнні аб аказанні дзяржаўнай фінансавай падтрымкі суб’ектам малога прадпрымальніцтва, прынятыя да ўступлення ў сілу гэтага Указа.

10. Гэты Указ уступае ў сілу з 1 ліпеня 2009 г., за выключэннем гэтага пункта і пунктаў 6 - 8, якія ўступаюць у сілу з дня афіцыйнага апублікавання гэтага Указа.

Прэзідэнт Рэспублікі Беларусь А.Лукашэнка