Паважаныя суайчыннікі!

Сардэчна віншую вас з Днём Перамогі.

Над гэтым вялікім святам не ўладарны час. Яно ўвасобіла бяспрыкладны подзвіг гераічных пакаленняў пераможцаў і вялікую радасць народаў, выратаваных ад гібелі і фашысцкага прыгнёту.

Нізкі паклон адважным франтавікам, партызанам і падпольшчыкам, мужным працаўнікам тылу, вязням канцлагераў, няўцешным удовам і асірацелым дзецям. Няма такой меркі, якой можна было б ацаніць вашы мужнасць і самаахвяраванне.

Няхай заўсёды вас акружаюць любоў і клопат родных, блізкіх вам людзей!

Беларуская зямля шчодра паліта крывёю абаронцаў Айчыны. Не ўсе яны паспелі стварыць сем'і, многія не зведалі шчасця бацькоўства ці мацярынства. За гады Другой сусветнай вайны наша краіна страціла амаль трэць сваіх жыхароў. Гэта вечная незагойная рана.

У Дзень 9 мая няма месца бяспамяцтву і забыццю, святатацтву і рэвізіі гісторыі. Урокі Вялікай Перамогі вучаць нас згуртаванасці і яднанню. Толькі разам мы зможам эфектыўна процістаяць тым, хто зноў спрабуе ажывіць ідэі нацызму, сее нацыянальную варожасць, распальвае рэлігійную нецярпімасць.

Ніколі не згасне агонь народнай памяці аб мужнасці, гуманізме і духоўнай велічы савецкага салдата. Не пацьмянее бляск ордэнаў і медалёў пераможцаў.

Шчыра жадаю ўсім вам, дарагія сябры, моцнага здароўя, бадзёрасці духу і дабрабыту.

Мірнага вам неба. Няхай у ім грымяць толькі святочныя салюты!

Аляксандр Лукашэнка