Аб мерах па развіццю вытворчасці легкавых аўтамабіляў

У мэтах стварэння ўмоў для развіцця вытворчасці легкавых аўтамабіляў у Рэспубліцы Беларусь:

1. Устанавіць, што:

1.1. юрыдычным асобам Рэспублікі Беларусь, якія заключылі з Міністэрствам прамысловасці пагадненне аб умовах вытворчасці легкавых аўтамабіляў (далей - пагадненне), што класіфікуюцца ў таварнай пазіцыі 8703 Таварнай наменклатуры знешнеэканамічнай дзейнасці Рэспублікі Беларусь (далей - легкавыя аўтамабілі), прадастаўляюцца падатковыя і мытныя льготы ў адпаведнасці з падпунктам 1.2 гэтага пункта.

Пагадненне заключаецца па форме, што зацвярджаецца Саветам Міністраў Рэспублікі Беларусь, і павінна змяшчаць наступныя істотныя ўмовы:

графік работ з разбіўкай па гадах і пазначэннем мяркуемых тэрмінаў пачатку вытворчасці легкавых аўтамабіляў і выхаду на праектныя вытворчыя магутнасці іх прамысловай зборкі. Пры гэтым вытворчасць зваркі, афарбоўкі і зборкі кузаваў легкавых аўтамабіляў павінна быць пачата не пазней як праз 30 месяцаў з дня заключэння пагаднення;

спецыфікацыю (пералік) аўтакампанентаў* для вытворчасці легкавых аўтамабіляў з пазначэннем іх назвы, колькасці і кошту;

абавязацельствы арганізацыі аб скарачэнні ўвозу аўтакампанентаў (за выключэннем кузаваў), названых у спецыфікацыі (пераліку), у вартасным вылічэнні на працягу першых 24 месяцаў пасля пачатку вытворчасці зваркі, афарбоўкі і зборкі кузаваў не менш як на 5 працэнтаў ад іх агульнага кошту, на працягу наступных 24 месяцаў - не менш чым на 10 працэнтаў ад іх агульнага кошту;

аб’ёмы інвестыцый з разбіўкай па гадах;

адказнасць бакоў за невыкананне або неналежнае выкананне сваіх абавязкаў па пагадненню;

тэрмін дзеяння пагаднення - не больш за 10 гадоў з магчымасцю яго прадаўжэння на перыяд, які не перасягае 10 гадоў з даты заканчэння тэрміну дзеяння першапачатковага пагаднення;

1.2. юрыдычныя асобы, названыя ў частцы першай падпункта 1.1 гэтага пункта (далей - арганізацыі), вызваляюцца:

1.2.1. на працягу трох гадоў з першага чысла месяца, наступнага за месяцам уступлення ў сілу пагаднення, ад вылічэння і выплаты падатку на прыбытак, акцызаў, збору ў рэспубліканскі фонд падтрымкі вытворцаў сельскагаспадарчай прадукцыі, прадуктаў харчавання і аграрнай навукі ў частцы аб’ёмаў выпушчаных легкавых аўтамабіляў і аўтакампанентаў уласнай вытворчасці і іх рэалізацыі.

Ільготы, названыя ў гэтым падпункце, прымяняюцца пры наяўнасці на апошні дзень справаздачнага перыяду адпаведнага сертыфіката прадукцыі ўласнай вытворчасці, выдадзенага ва ўстаноўленым парадку.

З дня спынення дзеяння пагаднення арганізацыя не мае права карыстацца льготамі, прадугледжанымі ў частцы першай гэтага падпункта;

1.2.2. у перыяд дзеяння пагаднення (у тым ліку пры прадаўжэнні тэрміну яго дзеяння) ад выплаты ўвазных мытных пошлін і падатку на дабаўленую вартасць (за выключэннем падатку на дабаўленую вартасць, які спаганяецца пры ўвозе тавараў на тэрыторыю Рэспублікі Беларусь з тэрыторыі Расійскай Федэрацыі ) пры змяшчэнні пад мытны рэжым свабоднага абарачэння тэхналагічнага абсталявання і аўтакампанентаў (далей - тавары), што ўвозяцца на мытную тэрыторыю Рэспублікі Беларусь для вытворчасці легкавых аўтамабіляў.

Падставай для вызвалення ад выплаты мытных пошлін і падатку на дабаўленую вартасць пры ўвозе на мытную тэрыторыю Рэспублікі Беларусь тавараў, названых у частцы першай гэтага падпункта, з’яўляецца заключэнне Міністэрства прамысловасці па форме, што зацвярджаецца Саветам Міністраў Рэспублікі Беларусь, якое пацвярджае, што ўвозімыя арганізацыяй тавары на мытную тэрыторыю Рэспублікі Беларусь прызначаны для вытворчасці легкавых аўтамабіляў.

Для выдачы заключэння арганізацыя прадстаўляе заяву, копію знешнегандлёвага дагавора (кантракта) і спецыфікацыю (пералік) тавараў.

Пры выкарыстанні ўвозімых на мытную тэрыторыю Рэспублікі Беларусь тавараў, вызначаных у частцы першай падпункта 1.2.2 гэтага пункта, на іншыя мэты, чым для вытворчасці легкавых аўтамабіляў, мытныя пошліны і падатак на дабаўленую вартасць выплачваюцца (спаганяюцца) у адпаведнасці з заканадаўствам.

2. У выпадку рэарганізацыі арганізацыі, якая заключыла пагадненне, у перыяд яго дзеяння правапераемнік такой арганізацыі, які з’яўляецца вытворцам легкавых аўтамабіляў, мае права заключыць новае пагадненне на астатні тэрмін дзеяння пагаднення, заключанага з рэарганізаванай арганізацыяй.

Пры гэтым правапераемнік рэарганізаванай арганізацыі, які заключыў новае пагадненне, мае права выкарыстоўваць ільготы, прадугледжаныя:

у падпункце 1.2.1 пункта 1 гэтага Указа, з першага чысла месяца, наступнага за месяцам уступлення ў сілу новага пагаднення, да заканчэння трохгадовага перыяду, устаноўленага для рэарганізаванай арганізацыі;

у падпункце 1.2.2 пункта 1 гэтага Указа, з даты заключэння новага пагаднення. Пры гэтым агульны тэрмін прымянення такіх ільгот вызначаецца з улікам тэрміну іх выкарыстання рэарганізаванай арганізацыяй і не можа перасягаць 10 гадоў, а пры прадаўжэнні тэрміну дзеяння такога пагаднення - 20 гадоў з дня яго заключэння рэарганізаванай арганізацыяй.

3. Савету Міністраў Рэспублікі Беларусь у трохмесячны тэрмін:

3.1. зацвердзіць:

Палажэнне аб арганізацыі вытворчасці легкавых аўтамабіляў з дзяржаўнай падтрымкай;

форму пагаднення аб умовах вытворчасці легкавых аўтамабіляў;

форму заключэння Міністэрства прамысловасці ў адпаведнасці з часткай другой падпункта 1.2.2 пункта 1 гэтага Указа;

3.2. прывесці акты заканадаўства ў адпаведнасць з гэтым Указам і прыняць іншыя меры па яго рэалізацыі.

4. Кантроль за выкананнем гэтага Указа ўскласці на Камітэт дзяржаўнага кантролю і Міністэрства прамысловасці.

5. Гэты Указ уступае ў сілу праз тры месяцы пасля яго афіцыйнага апублікавання, за выключэннем пункта 3 і гэтага пункта, якія ўступаюць у сілу з дня афіцыйнага апублікавання гэтага Указа.

________________

* Для мэт гэтага Указа пад аўтакампанентамі разумеюцца неабходныя для вытворчасці легкавых аўтамабіляў тавары (дэталі, вузлы, камплектуючыя вырабы, хімічная і лакафарбавая прадукцыя і іншыя тавары), што класіфікуюцца ў групах 32, 39, 40, 70, 72, 73, 76, 83-85, 87, 90, 91, 94, 96 Таварнай наменклатуры знешнеэканамічнай дзейнасці Рэспублікі Беларусь.

Прэзідэнт Рэспублікі Беларусь А.Лукашэнка