Аб арганізацыі ўступнай кампаніі ў вышэйшыя і сярэднія спецыяльныя навучальныя ўстановы ў 2009 годзе

У мэтах прадастаўлення грамадзянам роўных магчымасцей пры паступленні ў вышэйшыя і сярэднія спецыяльныя навучальныя ўстановы* і забеспячэння кантролю за падрыхтоўкай і правядзеннем уступных іспытаў п а с т а н а ў л я ю:

1. Стварыць дзяржаўную камісію па кантролю за ходам падрыхтоўкі і правядзення ўступных іспытаў у вышэйшых і сярэдніх спецыяльных навучальных установах у 2009 годзе (далей - дзяржаўная камісія).

2. Зацвердзіць Палажэнне аб дзяржаўнай камісіі па кантролю за ходам падрыхтоўкі і правядзення ўступных іспытаў у вышэйшых і сярэдніх спецыяльных навучальных установах у 2009 годзе і яе склад (прыкладаюцца).

3. Дзяржаўнай камісіі:

забяспечыць кантроль за падрыхтоўкай і правядзеннем цэнтралізаванага тэсціравання, а таксама іншых уступных іспытаў, прадастаўленнем абітурыентам роўных магчымасцей пры паступленні ў вышэйшыя і сярэднія спецыяльныя навучальныя ўстановы;

прымаць прадугледжаныя заканадаўствам меры па ўстараненню выяўленых парушэнняў нарматыўных прававых актаў, якія рэгулююць арганізацыю і правядзенне прыёму ў вышэйшыя і сярэднія спецыяльныя навучальныя ўстановы, а таксама па прыцягненню да адказнасці асоб, вінаватых у гэтых парушэннях;

ажыццяўляць прыём грамадзян па пытаннях падрыхтоўкі і правядзення ўступных іспытаў і ва ўстаноўленым заканадаўствам парадку разглядаць звароты абітурыентаў і іх бацькоў па гэтых пытаннях;

арганізаваць шырокае асвятленне ў сродках масавай інфармацыі пытанняў падрыхтоўкі і правядзення ўступнай кампаніі ў вышэйшых і сярэдніх спецыяльных навучальных установах;

да 1 верасня 2009 г. прадставіць Прэзідэнту Рэспублікі Беларусь справаздачу аб праведзенай рабоце.

4. Ускласці на Камітэт дзяржаўнага кантролю арганізацыйна-тэхнічнае забеспячэнне дзейнасці дзяржаўнай камісіі, на Міністэрства адукацыі - інфармацыйна-метадычнае забеспячэнне ўступнай кампаніі.

5. Ускласці на кіраўнікоў рэспубліканскіх органаў дзяржаўнага кіравання, іншых арганізацый, якія маюць у сваім падпарадкаванні вышэйшыя і (або) сярэднія спецыяльныя навучальныя ўстановы, персанальную адказнасць за выкананне заканадаўства пры падрыхтоўцы і правядзенні ў іх уступных іспытаў і залічэнні ў гэтыя навучальныя ўстановы абітурыентаў.

6. Гэты Указ уступае ў сілу з дня яго падпісання.

______________________
* Для мэт гэтага Указа да сярэдніх спецыяльных навучальных устаноў адносяцца тэхнікумы (вучылішчы), каледжы (сярэднія спецыяльныя навучальныя ўстановы), сярэднія школы-каледжы мастацтваў, гімназіі-каледжы мастацтваў, лінгвістычныя гімназіі-каледжы, прафесійна-тэхнічныя каледжы, вышэйшыя каледжы, а таксама каледжы, якія з'яўляюцца структурнымі падраздзяленнямі вышэйшых навучальных устаноў.

Прэзідэнт Рэспублікі Беларусь А.Лукашэнка