Дарагія суайчыннікі!

Віншую вас з 90-й гадавінай утварэння Беларускай Савецкай Сацыялістычнай Рэспублікі.

Для нас гэта падзея мае лёсавызначальнае значэнне. Яна змяніла ход нацыянальнай гісторыі, паклала пачатак слаўнаму летапісу ўласна беларускай дзяржаўнасці і важнаму этапу яе рэальнага станаўлення, дала магчымасць кансалідаваць нацыю, развіваць сваю самабытную культуру.

Створаная па волі народа, а не літасцю іншаземных акупантаў, новая самастойная рэспубліка падвяргалася самым бязлітасным выпрабаванням грамадзянскай вайны, знешняй агрэсіі і ўсеагульнай разрухі. Але яна не здалася! Стойка і мужна пераадольвала ўсе нягоды, аб'яднаўшы свае намаганні з брацкімі народамі і стаўшы адным з заснавальнікаў Савецкага Саюза - вялікай дзяржавы, якая вызваліла чалавецтва ад фашысцкага рабства. Яскравым сведчаннем прызнання сусветнай супольнасцю ўкладу БССР у агульную Перамогу стаў яе ўдзел у заснаванні Арганізацыі Аб'яднаных Нацый.

Уражальныя поспехі ў прамысловасці і аграрнай сферы, абнаўленні гарадоў і вёсак, развіцці навукі і культуры, правядзенні міралюбівай палітыкі, дасягнутыя ў савецкі перыяд, былі і застаюцца надзейнай базай для забеспячэння рэальнага суверэнітэту дзяржавы. Менавіта ў гэтыя гады быў закладзены фундамент, на якім і сёння трывала стаіць Рэспубліка Беларусь.

Адзначаючы слаўную дату і аддаючы даніну глыбокай павагі гістарычнай памяці народа, мы заўсёды будзем удзячныя тым, хто абараняў і ўздымаў з руін нашу Айчыну. Іх ратныя і працоўныя подзвігі натхняюць нас на пабудову моцнай і квітнеючай Беларусі.

У гэты знамянальны дзень жадаю вам, дарагія суайчыннікі, здароўя, аптымізму, дабрабыту і новых здзяйсненняў у імя любімай Радзімы.

Аляксандр Лукашэнка