Прэзідэнт Беларусі Аляксандр Лукашэнка 24 лістапада прыняў са справаздачай Віцэ-прэм'ера Аляксандра Косінца - упаўнаважанага прадстаўніка Прэзідэнта па Віцебскай вобласці.

Аляксандр Косінец далажыў аб сацыяльна-эканамічным развіцці рэгіёну, выкананні прагнозных паказчыкаў. Размова ішла аб праблемных пытаннях у галіне эканомікі, аграпрамысловага комплексу, у прыватнасці, аб прычынах невыканання прагнозных паказчыкаў у АПК. Прэзідэнтам была пастаўлена задача дасягнуць тэмпу росту вытворчасці сельгаспрадукцыі на ўзроўні 108,5 працэнта, а фактычна ён склаў 104,4 працэнта.

На сустрэчы абмяркоўваліся вынікі дзейнасці прамысловага сектара, у прыватнасці, былі закрануты пытанні бясстратнай работы прадпрыемстваў, развіцця будаўнічай галіны, жыллёва-камунальнай гаспадаркі і сацыяльнай сферы.

У гэты ж дзень, 24 лістапада, Прэзідэнт Беларусі Аляксандр Лукашэнка сваім Указам назначыў Аляксандра Косінца старшынёй Віцебскага аблвыканкама, вызваліўшы яго з пасады Намесніка Прэм'ер-міністра. У адпаведнасці з заканадаўствам кандыдатура Аляксандра Косінца ўносіцца на зацвярджэнне Віцебскага абласнога Савета дэпутатаў, сесія якога адбудзецца 25 лістапада.

Кіраўнік дзяржавы падкрэсліў, што "пасада губернатара - ключавая ў дзяржаве, без яго нельга вырашыць практычна ні аднаго пытання".

Аляксандр Лукашэнка адзначыў: "Тыя функцыі, якія ў свой час выконвалі партыйныя органы, зноў ляглі на плечы губернатараў - у частцы кадравай, ідэалагічнай работы, палітычных кампаній, таму тут роля губернатараў узрастае". Прэзідэнт падкрэсліў, што для Аляксандра Косінца гэтыя пытанні не з'яўляюцца новымі, яму даводзілася займацца імі на ранейшых пасадах. Будучы Віцэ-прэм'ерам, Аляксандр Косінец быў упаўнаважаным прадстаўніком Прэзідэнта па Віцебскай вобласці і добра знаёмы з сітуацыяй у рэгіёне, у якім ён раней працаваў.

Да гэтага Віцебскую вобласць узначальваў Уладзімір Андрэйчанка, які выбраны Старшынёй Палаты прадстаўнікоў Нацыянальнага сходу Рэспублікі Беларусь, і таму ў адпаведнасці з заканадаўствам вызвалены з пасады губернатара.