У Беларусі ўводзіцца новы, больш спрошчаны парадак дзяржаўных закупак. Адпаведны Указ № 618 "Аб дзяржаўных закупках у Рэспубліцы Беларусь" Кіраўнік дзяржавы Аляксандр Лукашэнка падпісаў 17 лістапада.

Дакументам замацаваны ключавыя прынцыпы рэгулявання ў галіне дзяржаўных закупак: забеспячэнне максімальнай эфектыўнасці расходавання бюджэтных сродкаў, галоснасці і празрыстасці закупачнага працэсу, добрасумленнай канкурэнцыі сярод патэнцыяльных пастаўшчыкоў, а таксама дэбюракратызацыя і спрашчэнне закупачнага працэсу.

У мэтах прадастаўлення большай самастойнасці і павышэння адказнасці прыняцце рашэнняў па пытаннях дзяржаўных закупак прадастаўлена кіраўнікам дзяржаўных органаў і саміх закупляючых арганізацый. Адмяняецца шматступеньчатая працэдура ўзгаднення з рознага ўзроўню дзяржаўнымі органамі.

Пры гэтым ліквідуецца інстытут міжведамасных камісій, экспертных саветаў, якія ўдзельнічалі ў прыняцці такіх рашэнняў, адмяняецца неабходнасць узгаднення прымаемых рашэнняў з вышэйстаячымі дзяржаўнымі органамі.

З улікам накопленага вопыту правядзення працэдур закупак ва ўказе ўдакладняецца паняцце дзяржаўных закупак, захоўваецца магчымасць іх цэнтралізацыі, вызначаюцца прынцыпцы яе ажыццяўлення.

Дакументам вызначаны пералік відаў працэдур дзяржаўных закупак. Гэта конкурс (адкрыты, закрыты, якія могуць быць двухэтапныя), працэдура запыту цэнавых прапаноў, працэдура афармлення канкурэнтнага ліста, а таксама як альтэрнатыва названым працэдурам працэдура закупкі з адной крыніцы.

Скарэкціраваны таксама пералік тавараў (работ, паслуг), пры набыцці якіх працэдуры конкурснай сістэмы закупак не прымяняюцца.

Асобныя дзяржаўныя органы надзяляюцца дадатковымі паўнамоцтвамі. Так, на Міністэрства фінансаў ускладаецца абавязак вядзення рэгістрацыі дагавораў аб дзяржаўных закупках, Нацыянальнаму статыстычнаму камітэту даручаецца вядзенне адзінай статыстычнай справаздачнасці па пытаннях дзяржаўных закупак.

Акрамя таго, устанаўліваецца адказнасць у адносінах да службовых асоб усіх узроўняў, якія ўдзельнічаюць у працэдурах закупак: кіраўнікоў дзяржаўных органаў (арганізацый) - персанальная, аж да вызвалення ад займаемай пасады, за незабеспячэнне патрабаванняў заканадаўства аб дзяржаўных закупках; старшынь і членаў камісій, створаных для правядзення конкурсаў (іншых відаў працэдур закупак), іншых спецыялістаў заказчыка, якія ўдзельнічаюць у працэсе ажыццяўлення дзяржаўных закупак, - дысцыплінарная, адміністрацыйная, крымінальная і (або) іншая за парушэнне правіл у сферы дзяржаўных закупак, якое прычыніла шкоду дзяржаве, арганізацыям або грамадзянам.

Палажэнні Указа ў цэлым накіраваны на ўдасканаленне парадку дзяржаўных закупак у рэспубліцы з улікам тыпавых міжнародных патрабаванняў да распараджальнікаў бюджэтных сродкаў па эфектыўнасці іх выкарыстання.

Дакумент уступае ў сілу праз два месяцы пасля яго афіцыйнага апублікавання, за выключэннем некаторых пунктаў. Калі працэдуры закупак пачаты або дагаворы на пастаўку тавараў (выкананне работ, аказанне паслуг) заключаны да ўступлення ў сілу Указа, то дзяржзакупкі тавараў (работ, паслуг) завяршаюцца па ранейшаму заканадаўству.