Беларусь бачыць вялікія перспектывы супрацоўніцтва з расійскай дзяржаўнай карпарацыяй "Растэхналогіі". Аб гэтым заявіў Прэзідэнт Беларусі Аляксандр Лукашэнка сёння на сустрэчы з генеральным дырэктарам карпарацыі Сяргеем Чэмезавым.

"Ваша карпарацыя вельмі цікавая нам, таму што займаецца прыкладна тым жа, чым 85 працэнтаў эканомікі нашай краіны. Нам вельмі выгадна супрацоўніцтва з Расіяй па гэтых напрамках. Таму нам цікавая сённяшняя сустрэча і перспектывы супрацоўніцтва", - сказаў Прэзідэнт.

Аляксандр Лукашэнка падкрэсліў, што існуе двухбаковая зацікаўленасць у тым, каб пачаць глабальнае супрацоўніцтва з карпарацыяй "Растэхналогіі". "Гэта вельмі выгадна і важна, па-першае, таму што гэта пэўны вопыт, а па-другое, нашы прадпрыемствы маюць магчымасць непасрэдна кантактаваць з вамі", - адзначыў беларускі лідэр. Аляксандр Лукашэнка дадаў, што ў прадпрыемства ёсць жаданне падтрымліваць гэтыя кантакты для развіцця кааперацыйных сувязей і ў далейшым. На думку кіраўніка дзяржавы, гэта добрая магчымасць, каб развівацца разам, а для гэтага "неабходны дадатковы імпульс, сігнал да супрацоўніцтва".

Прэзідэнт падкрэсліў, што ўзаемадзеянне з расійскай карпарацыяй Беларусі выгадна і ў святле міжнароднай абстаноўкі - і фінансавай, і эканамічнай. "У Беларусі людзі павінны працаваць, як працавалі да гэтага часу. Абвала ў краіне няма, асабліва ў фінансах", - сказаў Кіраўнік дзяржавы. Паводле яго слоў, людзі давяраюць уладзе і банкаўскай сістэме, на што дзяржава адказвае стопрацэнтным гарантаваннем укладаў насельніцтва. "Сёння ў дзяржаве грошай больш, чым у насельніцтва ва ўкладах. Калі раптам што-небудзь здарыцца, усе грошы дзяржавы будуць кінуты на тое, каб падтрымаць людзей", - падкрэсліў Прэзідэнт. Ён таксама дадаў, што стабільная сітуацыя ў Беларусі прывабная і для расіян і ўкраінцаў, якія размяшчаюць свае ўклады ў беларускіх банках.

Гаворачы аб сусветным фінансавым крызісе, Аляксандр Лукашэнка адзначыў, што гэта момант, калі павінны прымацца самыя сур'ёзныя рашэнні, калі павінна быць большая лібералізацыя эканомікі і большая свабода, каб выйсці з крызісу. Ён таксама дадаў, што ў Беларусі дзяржава не страціла эканамічны руль кіравання.

У сваю чаргу генеральны дырэктар карпарацыі Сяргей Чэмезаў падкрэсліў, што "ўжо наспела неабходнасць, якая прымушае аб'ядноўвацца". Ён паведаміў, што ў складзе карпарацыі створана 19 холдынгаў, у якія ўваходзіць больш як 400 прадпрыемстваў. Сяргей Чэмезаў дадаў, што ўсе прадпрыемствы зацікаўлены ў супрацоўніцтве з Беларуссю.