Дарагія суайчыннікі!

Віншую вас з Днём Кастрычніцкай рэвалюцыі.

Перамога Вялікага Кастрычніка адкрыла новую старонку ў сусветнай гісторыі. Абвясціўшы прынцып права нацый на самавызначэнне, яна стварыла небывалыя раней магчымасці для нацыянальнага адраджэння, паскоранага сацыяльна-эканамічнага і культурнага развіцця народаў.

Менавіта дзякуючы ўстанаўленню савецкай улады беларусы ўпершыню набылі сваю дзяржаўнасць - Беларускую Савецкую Сацыялістычную Рэспубліку.

Нашы прадзеды і дзяды шчыра верылі ў ідэалы рэвалюцыі - раўнапраўе і сацыяльную справядлівасць. У вельмі складаных умовах яны будавалі братэрскі саюз народаў СССР. Не шкадавалі жыцця ў барацьбе з іншаземнымі захопнікамі. Дабіваліся значных поспехаў у мірны час, ствараючы магутны навукова-вытворчы патэнцыял, асвойваючы космас, выкарыстоўваючы ў імя прагрэсу прыродныя рэсурсы.

Аддаючы даніну павагі гістарычным падзеям, сёння наша краіна ўпэўнена рухаецца наперад. Дынамічна развіваецца эканоміка, паляпшаецца жыццё людзей, умацоўваюцца абараназдольнасць дзяржавы і сацыяльна-палітычная стабільнасць грамадства, расце міжнародны аўтарытэт Беларусі. Усё гэта вынік правільнага стратэгічнага курсу, які падтрыманы беларускім народам і паслядоўна рэалізуецца ў складаных сучасных умовах.

Ад усёй душы жадаю вам, дарагія суайчыннікі, аптымізму, здароўя, шчасця, новых дасягненняў і дабрабыту.

Аляксандр Лукашэнка