Паважаныя суайчыннікі!

Ад усёй душы віншую вас з Днём Перамогі.

Гэта самая памятная і ўрачыстая дата ў гісторыі нашага народа, якая сімвалізуе яго гераізм, мужнасць і самаадданасць у барацьбе з фашысцкімі захопнікамі за свабоду роднай краіны.

Справы і ўчынкі герояў Вялікай Айчыннай вайны дастойны вечнага прызнання сусветнай супольнасці. На зямлі, дзе быў нанесены страшэнны ўрон ад вераломнай агрэсіі, кавалася дасягнутая вялікай цаной Перамога.

Вызваленне спазнілася да многіх нашых землякоў. Яны палі ў баях, згарэлі ў агні Хатыні, загінулі ў канцлагерах. Сёння мы ўслаўляем іх бяспрыкладны подзвіг у імя чалавецтва.

Дарагія ветэраны, моцнага вам здароўя на доўгія-доўгія гады!

Пашана і слава вам, Пераможцы!

Мы нікому не аддадзім на ганьбу Вялікую Перамогу, ніколі не дазволім яе ачарніць. Новыя пакаленні беларусаў высока ўшаноўваюць подзвіг дзядоў і бацькоў і пабудовай міралюбівай суверэннай дзяржавы дэманструюць вернасць запаветам тых, хто праліваў кроў за права на існаванне нашай Айчыны.

У гэты сапраўды святы дзень жадаю ўсім суграмадзянам святочнага настрою, аптымізму, дабрабыту і чыстага неба над галавой.

Аляксандр Лукашэнка