Хрысціянам Беларусі, якія святкуюць Вялікдзень 23 сакавіка 2008 года

Дарагія суайчыннікі!

Прыміце сардэчныя віншаванні са светлым святам Вялікадня.

Чыстая, глыбокая радасць велікодных падзей зноў аб'ядноўвае вернікаў, напаўняючы іх пачуццём вечнай урачыстасці жыцця і ўсёпераможнай сілай любові.

Уваскрэсенне Хрыстова - галоўны сімвал духоўнага адраджэння і абнаўлення. Гэта свята ўсяляе веру ў перамогу дабра, дорыць надзею на тое, што ўсё дрэннае засталося ў мінулым, а сучаснасць і будучыня прынясуць толькі мір і дабрабыт.

Вялікдзень нагадвае аб высокім прызначэнні чалавека, натхняе на стваральную працу, маральнае ўдасканаленне, заклікае нястомна служыць блізкім, дапамагаць хворым і бедным.

Няхай гэтыя цудоўныя веснавыя дні будуць для вас і вашых блізкіх па-сапраўднаму святочныя, самыя лепшыя і шчаслівыя, сагрэюць цеплынёй і ўзаемаразуменнем вашы сем'і, азораць сэрцы нягаснучым духоўным святлом.

Жадаю вам, дарагія суайчыннікі, моцнага здароўя, удачы ва ўсіх справах і пачынаннях, невычэрпных жыццёвых сіл і аптымізму.

Аляксандр Лукашэнка