Гавораць, Дзед Мароз жыве ці то ў Лапландыі, ці то ў Расіі, у Вялікім Усцюгу.

Сёння з гэтым можна паспрачацца — рэзідэнцыя Дзеда Мароза адбудавана на тэрыторыі Нацыянальнага парку «Белавежская пушча».

Вотчына лапландскага Санта–Клауса і ўладанні расійскага Дзеда Мороза ў Вялікім Усцюгу не могуць параўнацца з казачным маёнткам, размешчаным на пятнаццаці гектарах сярод практычна некранутых першабытных беларускіх лясоў.

Новы культурна–турысцкі аб’ект арганічна дапоўніў інфраструктуру ўсяго турысцкага комплексу Нацыянальнага парку «Белавежская пушча» і паклаў пачатак  фарміраванню новай традыцыі сустрэчы навагодніх свят для дзяцей і дарослых. Цяпер разам з магчымасцю размясціцца ў камфартабельных гасцініцах і гасцявых доміках, прадэгуставаць стравы беларускай кухні, прыгатаваныя з дзічыны, зрабіць  прагулкі па экалагічных сцежках, атрымаць шырокі спектр забаўляльных паслуг з’явілася магчымасць сустрэчы са светам казкі.

Рэзідэнцыя ўключае ў сябя непасрэдна маёнтак Дзеда Мароза, домік Снягуркі, музей Дзеда Мароза, ветраны млын, чарадзейны калодзеж, скульптурныя кампазіцыі з дрэва «12 месяцаў», «Беласнежка і сем гномаў», а таксама шэраг аб’ектаў гандлёвага, бытавога і забаўляльнага прызначэння. На тэрыторыі рэзідэнцыі самая высокая ў Еўропе саракаметровая натуральная елка ў сваім навагоднім убранні.

Рэзідэнцыя Дзеда Мароза працуе круглы год з 9.00 да 23.00 без выхадных дзён. Арганізавана экскурсійнае абслугоўванне.

Паштовы адрас рэзідэнцыі Дзеда Мароза: 225063, Брэсцкая вобл., Камянецкі р–н, п/а Камянюкі.
Тэл. (8–10–375–016-31) 56–370; (8–10–375–016-31) 56–267