ЗАЦВЕРДЖАНА
Указам Прэзідэнта
Рэспублікі Беларусь
ад 12 студзеня 1996 г. N 19

ПАЛАЖЭННЕ
аб спецыяльным фондзе Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў

1. Спецыяльны фонд Прэзідэнта Рэспублікі Беларусь па сацыяльнай падтрымцы адораных навучэнцаў і студэнтаў (далей - фонд) ствараецца з мэтай фінансавання мерапрыемстваў, накіраваных на стымуляванне інтэлектуальна-творчай дзейнасці моладзі ў галіне адукацыі і навукі.

2. Сродкі фонду ўтвараюцца за кошт:

асігнаванняў з рэзервовага фонду Прэзідэнта Рэспублікі Беларусь;

добраахвотных узносаў фізічных і юрыдычных асоб у выглядзе грашовых сродкаў (у тым ліку ў замежнай валюце) і матэрыяльных каштоўнасцей.

Улік сродкаў, якія паступаюць і расходуюцца, праводзіцца раздзельна ў рублях Нацыянальнага банка Рэспублікі Беларусь і замежнай валюце.

3. Сродкамі фонду распараджаецца савет, у склад якога ўваходзяць прадстаўнікі Адміністрацыі Прэзідэнта Рэспублікі Беларусь, зацікаўленых міністэрстваў і іншых рэспубліканскіх органаў дзяржаўнага кіравання, Акадэміі навук Беларусі, навучальных устаноў, прадпрыемстваў, устаноў і арганізацый, грамадскіх аб’яднанняў.

Савет фонду ўзначальвае старшыня.

Склад савета фонду зацвярджаецца Прэзідэнтам Рэспублікі Беларусь.

4. Савет фонду на падставе прапаноў устаноў, арганізацый і грамадзян прымае рашэнні аб выкарыстанні сродкаў фонду на:

правядзенне нацыянальных і міжнародных студэнцкіх навуковых канферэнцый, конкурсаў, семінараў, алімпіяд і іншых мерапрыемстваў, якія садзейнічаюць выяўленню таленавітай моладзі, развіццю яе інтэлектуальных здольнасцей і талентаў;

аплату навучання і стажыровак навучэнцаў і студэнтаў, якія праявілі сябе;

выплату заахвочвальных стыпендый;

фінансаванне студэнцкіх навукова-даследчых аб’яднанняў і школ, што заваявалі грамадскае прызнанне перспектыўнымі распрацоўкамі;

аказанне матэрыяльнай дапамогі студэнтам і навучэнцам, якія дабіліся высокіх паказчыкаў у вывучэнні гуманітарных і прыродазнаўча-навуковых дысцыплін;

заахвочванне настаўнікаў, навукова-педагагічных работнікаў і іншых асоб, якія ўнеслі асабісты ўклад у фарміраванне новай, больш эфектыўнай сістэмы адукацыі, распрацоўку сучасных методык развіцця здольнасцей адоранай моладзі ў галіне навукі, тэхнікі і перадавых тэхналогій;

садзейнічанне выдавецкай, выставачнай і іншай дзейнасці, якая павышае прэстыж адукацыі і навукі, вучэбна-пазнавальных каштоўнасцей і інтэлектуальнай працы;

распрацоўку і рэалізацыю комплексна-мэтавых праграм (праектаў), накіраваных на стварэнне спрыяльных умоў для творчай дзейнасці адоранай асобы.

5. Пасяджэнні савета фонду праводзяцца па меры неабходнасці, але не радзей за адзін раз у квартал. Пасяджэнне лічыцца правамоцным, калі на ім прысутнічае не менш як дзве трэці членаў савета фонду. Рашэнні прымаюцца простай большасцю галасоў прысутных членаў савета, афармляюцца пратаколамі і зацвярджаюцца Прэзідэнтам Рэспублікі Беларусь.

6. Арганізацыйна-тэхнічнае забеспячэнне дзейнасці савета фонду ажыццяўляе Міністэрства адукацыі.

7. Савет фонду штогод прадстаўляе ў Кіраўніцтва справамі Прэзідэнта Рэспублікі Беларусь справаздачу аб выкарыстанні сродкаў фонду.

8. Аперацыі па накапленню і расходаванню сродкаў фонду ажыццяўляюцца Кіраўніцтвам справамі Прэзідэнта  Рэспублікі Беларусь.