Царква абарончага тыпу - канец ХV-пачатак ХVІ ст.
в.Сынковічы

Царква-крэпасць - унікальны помнік абарончага дойлідства сярэдзіны 16 стагоддзя. Да нашых дзён захавала сваё аблічча амаль нязменным. У плане - крыху перакошаны чатырохвугольнік памерам 17,5х13 м з трохнефным чляненнем. Усе нефы маюць амаль аднолькавую шырыню (4 м). Таўшчыня сцен дасягае 1,5 м. Высокі двухсхільны дах надае будынку стройнасць і лёгкасць. Чатыры вежы, размешчаныя па вуглах, адрозніваюцца памерамі і архітэктурнымі формамі. Дзве заходнія вежы стаяць на квадратных фундаментах, з трох бакоў іх падтрымліваюць контрфорсы. Верхняя частка вежаў - васьміграннік з трыма ярусамі байніц. Дзве ўсходнія вежы маюць цыліндрычную форму, тут таксама ёсць байніцы. У вежах знаходзяцца лесвіцы, якія некалі вялі да байніц, размешчаных у франтоне.

У архітэктуры выяўляюцца рысы раманскага і гатычнага стыляў.