Спаса-Праабражэнская царква - ХІІ ст.
г. Полацк, вул. Ефрасінні Полацкай, 59

Пабудавана паміж 1152 і 1161 гадамі полацкім дойлідам Іаанам па заказу Ефрасінні Полацкай як саборны храм Спаса-Ефрасіннеўскага манастыра. Некалькі разоў храм пераходзіў ад адной канфесіі да другой.

Капітальна адрамантавана ў 1800-1803 гадах.

Пасля скасавання езуіцкага ордэна ў 1820 годзе Спаса-Праабражэнскі храм быў аддадзены манахам ордэна піяраў. У 1832 годзе царква была перададзена ў праваслаўнае ведамства, спачатку ў падпарадкаванне Магілёўскаму епіскапу, а потым у Полацкую епархію.

Храм дзейнічае.

Гэта мураваны прамавугольны выцягнуты ў плане (8х12 м) аб'ём з купалам на высокім барабане. Цэнтральны неф з усходу завершаны паўкруглай масіўнай апсідай. Бакавыя алтары малых памераў паўцыркульныя, звонку нябачныя.

У царкве пад больш познімі напластаваннямі тынкоўкі і пабелкі, алейнай размалёўкі 1832-1835 гг. і 1840 г. захаваліся ўнікальныя старажытныя фрэскі, створаныя майстрамі 2-й палавіны XII стагоддзя.