Прэзідэнт Рэспублікі Беларусь 9 жніўня падпісаў Указ № 347, якім унесены змяненні і дапаўненні ва Указ ад 27 сакавіка 2008 г. № 178 "Аб парадку правядзення і кантролю знешнегандлёвых аперацый".

Дакумент накіраваны на ўдасканаленне парадку ажыццяўлення знешнегандлёвай дзейнасці шляхам пашырэння магчымасцей суб'ектаў гаспадарання ў рэалізацыі экспартна-імпартных здзелак пры ўстанаўленні адэкватнага кантролю за імі. Важнай умовай пры гэтым з'яўляецца адсутнасць перадумоў для тармажэння ў ходзе кантролю выканання дагаворных абавязацельстваў.

Рэгістрацыя здзелак будзе ажыццяўляцца не па асобных дадатках да знешнегандлёвага дагавора, а па дагавору ў цэлым. Гэта дасць магчымасць скараціць колькасць зваротаў суб'ектаў знешнеэканамічнай дзейнасці ў банкі ў мэтах ажыццяўлення працэдурных пытанняў правядзення здзелак. Пры гэтым прадугледжваецца адмена платы за рэгістрацыю банкамі здзелак.

Адмяняецца рэгістрацыя здзелак па дагаворах, не звязаных з аплатнай перадачай тавараў. Гэта дагаворы на выкананне работ, аказанне паслуг, перадачу ахоўнай інфармацыі і выключных правоў на вынікі інтэлектуальнай дзейнасці.

З улікам разнастайнасці сітуацый, якія ўзнікаюць пры ажыццяўленні знешнегандлёвай дзейнасці, Указам прадугледжваецца магчымасць завяршэння знешнегандлёвых аперацый пры экспарце. Гэта можна ажыццявіць праз атрыманне іншай кампенсацыі згодна з умовамі заключанага дагавора ў выпадку страты (гiбелi, выпадковага пашкоджання, псавання або крадзяжу) тавараў, а таксама праз рэалізацыю тавараў іншаму нерэзідэнту без абавязковага вяртання названых тавараў на мытную тэрыторыю Рэспублікі Беларусь. Акрамя таго, прадугледжана магчымасць завяршэння знешнегандлёвых аперацый у выпадку канфіскацыі тавараў, а таксама ў выніку разгляду спрэчак у судовым парадку або ў выпадку прызнання контрагента банкрутам.

У пералік знешнегандлёвых аперацый, на якія не распаўсюджваецца дзеянне Указа № 178, уключаны аперацыі негандлёвага характару.

Падаўжэнне тэрмінаў завяршэння знешнегандлёвых аперацый будзе ажыццяўляцца Нацыянальным банкам пры захаванні ўмоў, вызначаных ім сумесна з Саветам Міністраў. Наяўнасць сумесна выпрацаваных умоў для рэзідэнтаў, пры якіх тэрміны завяршэння знешнегандлёвых аперацый могуць быць прадоўжаны Нацыянальным банкам, дасць магчымасць выключыць суб'ектыўны падыход у вырашэнні гэтага пытання.

Для забеспячэння далейшага маніторынгу і кантролю за знешнегандлёвымі аперацыямі ўводзіцца абавязак удзельнікаў знешнеэканамічнай дзейнасці інфармаваць банкі аб закрыцці раней зарэгістраваных здзелак.

Указ уступае ў сілу праз тры месяцы пасля яго афіцыйнага апублікавання.