Беларускае заканадаўства гарантуе абарону інвестыцый, свабоднае распараджэнне атрыманым прыбыткам і спрыяльныя ўмовы для інвестараў. Аб гэтым гаворыцца ў прывітанні Прэзідэнта Беларусі Аляксандра Лукашэнкі, якое ён накіраваў удзельнікам і гасцям Беларускага інвестыцыйнага форуму, што адкрыўся сёння ў Германіі.

"Шчыра рады, што нам удалося прыцягнуць да такога мерапрыемства вельмі аўтарытэтную дзелавую аўдыторыю. Ваш удзел у форуме мы разглядаем як сведчанне ўзрастаючага інтарэсу замежнага бізнесу да Рэспублікі Беларусь, які мы будзем усяляк падтрымліваць", - гаворыцца ў прывітанні.

Выгаднае геаграфічнае становішча Беларусі, стабільная эканамічная сітуацыя, высокі чалавечы патэнцыял, а таксама рост эканомікі, дынамічнае паляпшэнне інвестыцыйнага клімату - гэта толькі некаторыя характарыстыкі, уласцівыя сучаснай Беларусі.

“Для інвестыцый адкрыты ўсе сферы беларускай эканомікі. Энергетычная, транспартная, турыстычная інфраструктура, стварэнне новых навукаёмістых вытворчасцей у прамысловасці і сельскай гаспадарцы – нашы безумоўныя прыярытэты і выгадныя напрамкі інвесціравання”, - адзначыў у прывітанні Аляксандр Лукашэнка.

Кіраўнік дзяржавы таксама выказаў упэўненасць, што форум стане зыходным пунктам і для шэрага сур'ёзных праектаў, выгадных інвестарам і накіраваных на развіццё эканомікі Беларусі, павышэнне дабрабыту беларускіх грамадзян.