Рабочая паездка ў Мінскі раён

Прэзідэнт Беларусі Аляксандр Лукашэнка наведаў 27 кастрычніка з рабочай паездкай Мінскі раён.

У ходзе рабочай паездкі Кіраўнік дзяржавы азнаёміўся з падыходамі ў будаўніцтве індывідуальнага жылля для грамадзян індустрыяльным метадам. Пры гэтым было абазначана галоўнае - усё неабходна рабіць без цяганіны і без лішніх затрат.

Аляксандр Лукашэнка прыехаў у будуемы мікрараён малапавярховай жылой забудовы Новая Аколіца. "Тэма нашага сённяшняга мерапрыемства - будаўніцтва жылля без бюракратыі і цяганіны, - з такіх слоў Прэзідэнт пачаў рабочую паездку. - Людзі скардзіліся, што доўга будуем. І справа нават не ў тым, што мы доўга будуем нейкае жыллё: каб пачаць будаўніцтва, трэба хадзіць па чыноўніках, прасіць нейкія дазволы. Хто на МНС, хто на міліцыю скардзіўся і гэтак далей".

Кіраўнік дзяржавы нагадаў, што раней быў зроблены першы крок - прыватным забудоўшчыкам дазволілі будаваць так, як яны хочуць. Як некалі ў сельскіх населеных пунктах будавалі аднапавярховыя дамы, і пры гэтым людзі "ні ў кога не пыталіся, як будаваць".

"Таму было прынята рашэнне: хочаш будаваць - калі ласка, будуй. Можаш наогул ні ў кога дазвол не браць. Адзінае патрабаванне - каб дом больш-менш выглядаў нармальна і ўпісваўся ў вёску. Калі хочаце параіцца з міліцыяй, МНС, якімі-небудзь архітэктарамі - калі ласка, райцеся. Ваша справа. Але вы адказваеце - у вас дах, столь над галавой, - сказаў Аляксандр Лукашэнка. - Нічога не абвалілася. Людзі будуюць. Але яшчэ нейкія размовы ідуць. Усё нечага там не хапае. Але і ў нейкай ступені яны маюць рацыю. Мабыць, мы нешта не дарабілі".

У пачатку года віцэ-прэм'еру Анатолю Сіваку было даручана ў Новай Аколіцы пабудаваць пасёлак на тэрыторыі амаль 50 га. "І я яму сказаў: ідзі і будуй па-гаспадарску, так, як ты палічыш патрэбным, прымай рашэнне. Але я яго папрасіў, каб тут быў не асфальт, а бетон (пад'язныя дарогі. - Заўвага) - гэта навекі. Без усякіх празмернасцей. Тут з розумам павінен быць пабудаваны пасёлак. Так, як трэба людзям. Без лішніх затрат", - заявіў Прэзідэнт.

Асаблівую ўвагу Кіраўнік дзяржавы звярнуў на азеляненне прылеглай да дамоў тэрыторыі, уздоўж дарог і на развязках. Ён даў канкрэтныя даручэнні, каб усё рабілася па-гаспадарску і эканомна. А што датычыцца тэрыторый каля прыватных дамоў, то тут ужо справа за самімі жыльцамі, і іх трэба на гэта арыентаваць.

"Па-гаспадарску трэба падыходзіць да ўсяго. А па-гаспадарску - гэта эканомія мільёнаў-мільёнаў рублёў. Таму мэта была і задача для віцэ-прэм'ера (ён прымае рашэнне): як вырашыце, так павінна быць, але па-гаспадарску", - адзначыў Аляксандр Лукашэнка.

Намеснік Прэм'ер-міністра Анатоль Сівак заўважыў, што ў чалавека, які мае ўласны дом і ўчастак, зусім іншы ўзровень жыцця.

"Ты маеш рацыю, гэта іншы чалавек. Я беларусам увесь час гавару: у Беларусі ўсе ўчастачкі, кавалачкі зямлі - гэта падарунак, шчасце. Я іх увесь час падштурхоўваю: купіце - у вёсках, далёкіх, неперспектыўных, закінутых. Гэта для людзей падарунак. Няхай будзе кавалачак гэтай зямлі, яна ж амаль бясплатна цяпер. Расіяне пачулі, цяпер шалёныя грошы плацяць. Нашы - туды-сюды", - сказаў Аляксандр Лукашэнка.

Дзяржаўныя прадпрыемствы пакуль практычна не працуюць на рынку прыватнай жылой забудовы. І праект мікрараёна Новая Аколіца - гэта спроба выправіць сітуацыю і патанніць будаўніцтва для людзей. "Гэты пасёлак - першы этап. 12 нашых арганізацый будуюць тут дамы. У гэтай сітуацыі мы абкатваем і пэўныя тэхнічныя рашэнні", - далажыў Анатоль Сівак.

Напрыклад, па вуліцах унутры забудовы прадугледжаны аднабаковы рух, а грузавы і тэхнічны транспарт будзе рухацца толькі па ўскраіне тэрыторыі. У дамах ужо ёсць вада і каналізацыя, электраацяпленне. Кошт квадратнага метра пачынаецца з Br2,4 тыс. "Гэта цалкам гатовы дом", - заявіў віцэ-прэм'ер.

"Было даручана зрабіць розныя тыпы дамоў, каб чалавек мог выбраць", - нагадаў Прэзідэнт.

"Ёсць і драўляныя дамы. Ёсць шчытавы, з цэглы, газасілікатны", - далажыў Анатоль Сівак.

"У нас будуецца 19 тыпаў жылых дамоў, але асартымент будзе павялічвацца. Нашы вытворцы прапануюць новыя канфігурацыі, новыя плошчы. Самая маленькая плошча - 70 квадратных метраў, самая вялікая - 140 квадратных метраў", - удакладніў Міністр архітэктуры і будаўніцтва Руслан Пархамовіч.

У час будаўніцтва быў адзначаны шэраг бюракратычных перашкод, з-за якіх падагульняючы кошт дома атрымліваецца вышэйшы. Кіраўніку дзяржавы прапанавалі ўнесці змяненні ў існуючыя нарматыўныя прававыя акты, каб зняць гэтыя недахопы. Акрамя таго, урад прапануе прыняць стымулюючыя меры, у тым ліку пашырыць ільготнае крэдытаванне, каб зацікавіць людзей у куплі дома ў вёсцы.

"Уносьце, каб мы ў бліжэйшы час прынялі нарматыўныя прававыя акты і працавалі", - даручыў Аляксандр Лукашэнка.

Цяпер у Беларусі распрацоўваецца канцэпцыя будаўніцтва жылля на наступную пяцігодку. Анатоль Сівак лічыць, што трэба больш заходзіць у існуючую інфраструктуру. "У нас сёння застаюцца дамы, якія трэба капітальна рамантаваць. Яны ў памежным стане. Можна пяціпавярховы дом-хрушчоўку знесці, каробку, пакінуўшы фундамент, і на яго паставіць", - прапанаваў ён.

"Уносьце прапановы. Лічыце, што гэта прынята. Гэта якраз гаспадарскі падыход", - адказаў Кіраўнік дзяржавы.

Заслухаўшы даклад, Аляксандр Лукашэнка азнаёміўся з рознымі варыянтамі дамоў, якія будуюцца ў мікрараёне.

"Добры домік. Я паглядзеў планіроўку: тры-чатыры пакоі. Тры спальні, асобна кухня, сумешчаная з гасцінай. Выдатныя праекты. Ідэальна на зямлі", - пазітыўна ацаніў убачанае Прэзідэнт.

"Падыходзіць. Калі вы гаворыце, што гэта нармальна, ніякай цяганіны, дык трэба і будаваць. Каб вы не бегалі і не ўгаворвалі нікога. Прыйшоў, дамовіўся са спажыўцом, пабудаваў. І кошт вызначаны. Але гэта цана не на страту?" - удакладніў Кіраўнік дзяржавы ў будаўнікоў.

Як праінфармавалі Прэзідэнта, дамы пабудаваны з пяціпрацэнтнай рэнтабельнасцю.

"А калі ты пастараешся, сэканоміш, можа і 7%?" - заўважыў Аляксандр Лукашэнка.

"Працуем у гэтым плане", - адказаў падрадчык.

"На людзях не трэба нажывацца. Мы ж і цэны прытрымліваем, абмяжоўваем. Але не на страту, - дадаў Кіраўнік дзяржавы. - Самае галоўнае, што гэта добры для вас дадатковы заработак. Рэнтабельнасць няхай невялікая, але ёсць".

Знаёмячыся з жылой забудовай, Прэзідэнт яшчэ раз запатрабаваў разабрацца з бюракратычнай цяганінай пры будаўніцтве дамоў. "Будзем яшчэ паглыбляцца. Уносьце прапановы. Вы лепш ведаеце, дзе трэба нешта зрэзаць, каб вы не бегалі, не кланяліся і не прасілі. І вам будзе добра, і людзям", - падкрэсліў ён.

У час рабочай паездкі ў Мінскі раён Аляксандр Лукашэнка адказаў на пытанні журналістаў.

Прэзідэнт расказаў, што мае намер у хуткім часе правесці нараду па рэгуляванні цэн.

"У бліжэйшы час (у бягучым годзе дакладна, будзе залежаць ад камандзіровак) мы правядзём нараду і ўжо не тое што ўвогуле паразважаем, а паглядзім ужо, што ўрад зрабіў за гэты час, каб мы маглі цэны трымаць каля сябе, за руку. Па вялікім рахунку, мы мелі рацыю. Аказваецца, жыру столькі назбіралі, асабліва гандлёвыя сеткі, ды і вытворцаў хапала, што ёсць дзе яго здымаць. Тры дні таму я па гэтым пытанні распытваў Снапкова (першы віцэ-прэм'ер Мікалай Снапкоў. - Заўвага), ён адказвае ва Урадзе за гэта. І ён згадзіўся, што яшчэ ёсць жырок, які можна шліфаваць у нашых вытворцаў і гандлю. Удаецца цэны трымаць на патрэбным узроўні. Яшчэ ёсць над чым працаваць, але зрабілі правільна", - сказаў Аляксандр Лукашэнка.

Кіраўнік дзяржавы адзначыў, што інфляцыя ў Беларусі цяпер крыху большая за 3%, а чакалася, што яна будзе вышэйшай. "Можа, яна крыху і падрасце да новага года, але гэта не 9% будзе. Гэта мы ў два разы скарацілі рост цэн, скарацілі інфляцыю. Таму правільна зрабілі", - перакананы Прэзідэнт.

У той жа час Аляксандр Лукашэнка падкрэсліў, што цэны не павінны насаджвацца зверху. Вытворцам і гандлю неабходна самім устанаўліваць кошт свайго тавару і паслуг. "Але парадак павінен быць агульным, - звярнуў увагу Кіраўнік дзяржавы. - Там, дзе кантроль, там і вынік ёсць".

"Таму тое, што мы ўзяліся за рэгуляванне і настройку цэн, - гэта правільна. Але бізнесмены, прадпрымальнікі, вытворцы і прадаўцы не павінны бегаць да начальнікаў па кабінетах і пытаць: "А як цэны ўстанавіць нам?" Гэтага быць не павінна. За гэта будзе строгае спагнанне са Снапкова і са "снапкоўцаў", як я яму сказаў. Яны павінны прапанаваць такі варыянт, каб бізнесмен сам устанаўліваў цэны на свой тавар, не завышаючы іх. Вось на гэту тэму мы будзем размаўляць. І ўжо там падрабязна разбяромся, што нам яшчэ трэба рабіць. Але данастройка гэтага механізма ідзе пастаянна", - падкрэсліў Прэзідэнт.

У час размовы з журналістамі Аляксандр Лукашэнка падкрэсліў неабходнасць больш хуткага пачатку мірных перагавораў па канфлікце ва Украіне.

"Вы бачыце, яны мітусяцца - украінцы. І нават калі амерыканцы будуць ім дапамагаць (яны ўжо намякаюць - не бязмежна), думаю, што разумных людзей нямала ва Украіне. Трэба садзіцца за стол перагавораў і дамаўляцца. Як я калісьці гаварыў: не трэба папярэдніх умоў. Галоўнае - далі каманду "Стоп". Вось з 00.00 гадзін "Стоп": ніякія войскі не рухаюцца, ніхто не страляе, рэзервы ніхто не падкідвае, камунікацыі не аднаўляюць. Спыніліся і вядзём перагаворы. Перагаворы аб чым - аб зямлі і аб міры", - сказаў Прэзідэнт.

Ён адзначыў, што ўкраінцы, напрыклад, будуць ставіць пытанні па Усходняй Украіне, Данбасе, Крыме. Але жадаць гэта трэба за сталом перагавораў, каб ніхто не ваяваў і не гінулі людзі.

"Самае небяспечнае для Украіны - зброя будзе, але ваяваць не будзе каму. Мы ж бачым, што там адбываецца. Спачатку гэтыя, ведаеце, ідэалагічна выхаваныя, нацмены сапраўдныя - яны ваявалі. Дзе яны? Яны ўсе загінулі практычна або калекамі засталіся", - сказаў Прэзідэнт.

Цяпер жа, канстатаваў Аляксандр Лукашэнка, ва Украіне людзей фактычна хапаюць на вуліцы і непадрыхтаванымі адпраўляюць ваяваць. "Кажуць, у штурмавыя атрады ставяць са зброяй, і на барыкады, дзе расіяне сядзяць да зубоў узброеныя. Назад не павернеш - загараджальны атрад, - адзначыў ён. - З Украіны бягуць людзі, ваяваць ніхто не хоча".

Прэзідэнт адначасова падкрэсліў, што праблем хапае з абодвух бакоў, і ў цэлым абстаноўка цяпер складваецца патавая - ніхто не можа нічога зрабіць і неяк сур'ёзна ўмацаваць і прасунуць свае пазіцыі. "Стаяць лоб у лоб насмерць, акапаўшыся. Гінуць людзі", - сказаў ён.

Адказваючы на пытанні журналістаў, Прэзідэнт выказаўся аб сітуацыі на Блізкім Усходзе.

"Гэта бяда. Блізкі Усход - тут заўсёды быў тэатр ваенных дзеянняў, калі ўзарвецца, то там будзе горача ўсім. Ён будзе падаграваць і нас, і туды далей на поўнач усе краіны. Як там будзе развівацца сітуацыя - аднаму богу вядома. Гэта ж амерыкосы закручваюць там цяпер гэту ўсю цяганіну", - заявіў Аляксандр Лукашэнка.

Паводле слоў Кіраўніка дзяржавы, гэта амерыканскі бок сказаў ізраільцянам не наступаць у сектар Газа, пакуль ЗША не разгорнуць у рэгіёне свае сілы. "Яны туды сунуліся - разведвойскі - іх там усіх зрашэцілі. Амерыканцы з яўрэямі зайшлі ў сектар Газа, каб намацаць абстаноўку, спланаваць наземную аперацыю. Іх усіх знішчылі. Гэта сведчыць аб тым, што там сур'ёзныя людзі. Той жа ХАМАС, а, можа, і не ХАМАС - ніхто не ведае, хто там", - сказаў Прэзідэнт.

Ён таксама адзначыў, што ізраільцяне разважаюць аб тым, што рабіць з падземнымі камунікацыямі ў сектары Газа, ці варта іх затапляць, там жа дагэтуль утрымліваюць каля 200 заложнікаў, у тым ліку замежных грамадзян.

"Шмат такіх нюансаў. Але амерыканцы ўсім кіруюць. Сказалі "стоп" - стаім. Сказалі "наступаць" - наступаем", - адзначыў беларускі лідар.

Кіраўнік дзяржавы лічыць, што ЗША спрабуюць рабіць палітыку ў каламутнай вадзе, каб захаваць дамінуючае становішча ў свеце. Дзеля гэтага амерыканцы садзейнічаюць распальванню розных канфліктаў.

"Выкажу сваё меркаванне: думаю, што амерыканцы ўчулі змяненне сітуацыі ў свеце. Шматпалярнасць і іншае. Ім гэта вельмі не трэба. А як устаяць? Вось яны і спрабуюць, як звычайна, распаліць хаос унутры краін, вось як у нас спрабавалі зрабіць гэта. А на міжнароднай арэне вось гэтыя вось месцы - падпаліць вайнушку. У каламутнай вадзе. Гэта іх палітыка. Украіна - уся Еўропа калашмаціцца, ім не да Блізкага Усходу, не да іншых пытанняў. Блізкі Усход - гэта, значыць, увесь арабскі свет там, і Афрыцы хопіць. І, вы ж ведаеце, яны там на ўсходзе - Тайвань і іншае. Там яшчэ гэту заварушку арганізуюць. Вось ім трэба ўвесь свет, каб ён бурліў, каб гэта муць усюды была", - сказаў Прэзідэнт.

"Такім чынам яны хочуць захаваць сваё дамінуючае становішча ў свеце. Гэта мае разважанні. Але, думаю, у гэтым нешта ёсць. Гэта іх палітыка", - дадаў Аляксандр Лукашэнка.

Кіраўнік дзяржавы лічыць неабходным стварыць Палесцінскую дзяржаву, што можа садзейнічаць вырашэнню канфлікту на Блізкім Усходзе.

"Выхад адзін - трэба ствараць Палесцінскую дзяржаву. Так, як было ў 1947 годзе прынята рашэнне. Чаго тут нападаць на гэтага беднага Гутэрыша - "не тое ляпнуў"? Ён правільна сказаў. У жудасных умовах жывуць людзі. Ім трэба стварыць дзяржаву. Сказаць: не аўтаномія палесцінская - вось ваша дзяржава, а вось яўрэйская дзяржава. Сесці і дамовіцца раз і назаўсёды", - заявіў беларускі лідар.

"Будуць граніцы, яны будуць жыць у сваёй дзяржаве. Тады ім можна і выстаўляць прэтэнзіі. Чаго ж людзей пад зямлю загналі і патрабуем ад іх, каб яны крычалі: "Ура, ура, вы, ізраільцяне, малайцы, маеце рацыю"? - адзначыў Аляксандр Лукашэнка.

Ён падкрэсліў, што ні ізраільскаму народу, ні палесцінскаму канфлікт і вайна не патрэбны. "Яны хочуць спакойна жыць, гадаваць дзяцей", - сказаў Прэзідэнт.

Кіраўнік дзяржавы таксама падкрэсліў немагчымасць сілавога вырашэння пытання. "А насельніцтва там (на палесцінскіх тэрыторыях. - Заўвага) вы бачыце: ніякія дывановыя бамбёжкі не дапамогуць. Гэта будзе эскалацыя і ўцягванне новых краін у гэты канфлікт".

"Можа быць трэцяя сусветная вайна. Яна можа адтуль пачацца. Якім чынам: калі яны (Ізраіль і іх саюзнікі. - Заўвага) пачнуць з Іранам ваяваць. Ужо не Іран іх тузае, а яны іранцаў пачынаюць тузаць. Ну чаго вы? У вас што, факты ёсць, што там Іран мае дачыненне да гэтага (атакі байцоў ХАМАС на ізраільскія тэрыторыі. - Заўвага)? Ёсць факты - пакладзіце іх на стол, мы паглядзім. Але ніхто ж не выставіў Ірану прэтэнзіі на аснове нейкіх фактаў", - сказаў Кіраўнік дзяржавы.

Аляксандр Лукашэнка ў гэтым плане падкрэсліў, што выкарыстанне бакамі канфлікту зброі, якая вырабляецца ў той ці іншай дзяржаве, яшчэ нічога не даказвае: "Так, ракеты, нібыта "Шахіды", беспілотнікі (іранскай вытворчасці. - Заўвага) лятаюць. Дык і вашы беспілотнікі, ракеты ва Украіне лятаюць. Ідзе гандаль зброяй. Гэта дрэнна. Але гэта ж легальна. Можа, хтосьці праз нейкія рукі і купіў, ХАМАС купіў гэтыя ракеты. А колькі з Украіны зброі паступіла туды? Паказваюць нумары гэтых амерыканскіх вінтовак. Яны ж усе на ўліку. Вось яны з Украіны паступілі і паступаюць".

"Таму блытаніна сур'ёзная. Калі амерыканцы, падцягнуўшы туды гэтыя ўдарныя авіягрупы, авіяносцы, пачнуць бамбіць з Міжземнага мора (хоць не думаю, што яны вар'яты) нейкія краіны і асабліва Іран, то Іран адкажа. І не факт, што авіяносец устаіць у Міжземным моры. Патопяць. Гэта катастрофа. Таму вельмі шмат такіх рэчаў, якія гавораць аб тым, што можа ўспыхнуць сур'ёзны канфлікт, а можа і вайна з прымяненнем самай сур'ёзнай зброі. Ніхто не ведае, як будуць развівацца падзеі. Нават тыя, хто там заварыў гэту кашу, - амерыканцы - яны не ведаюць, у што гэта выльецца", - сказаў Прэзідэнт.

"Але на месцы арабы іх папярэджваюць - шыіты і іншыя. Яны ж наносяць удар па іх базах у Сірыі і іншае - там, дзе амерыканскія базы размешчаны. Яны іх папярэджваюць: мы не тыя, што былі 10 гадоў таму", - дадаў Аляксандр Лукашэнка.

Прэзідэнт адказаў на заявы, якія часам гучаць, што Расіі і Беларусі можа быць выгадны ізраільска-палесцінскі канфлікт.

"Каму выгадна? Вось нас з расіянамі папракаюць: "Выгадна - Украіна адышла на другі план". Слухайце, ну давайце шчыра: тое, што пра нас пачалі менш гаварыць, ну, напэўна, нядрэнна. Але не такой жа цаной. Людзі гінуць. Чаго мы радавацца будзем?" - сказаў Аляксандр Лукашэнка.

Ён звярнуў увагу, што па гэтай логіцы можна знайсці і іншых выгадаатрымальнікаў ад сітуацыі на Блізкім Усходзе. "А што, амерыканцам не выгадна? У іх выбары. Ва Украіне яны пралічыліся, і вельмі моцна. І выбары, і Украіна - не атрымліваецца. Трэба неяк перайсці на іншае поле. Вось яно - ціхенька пяройдзем туды, там прасцей. Там жа не супраць Расіі, ядзернай дзяржавы, ваяваць. Таму ім гэта выгадна".

Або ўзяць унутрыпалітычную сітуацыю ў самім Ізраілі: "Паглядзіце, што там адбываецца. Там жа ўнутры ідзе фактычна бойня. Гэтага беднага Нетаньяху (ізраільскі палітык і цяперашні Прэм'ер-міністр Біньямін Нетаньяху. - Заўвага) ужо мочаць колькі месяцаў запар і гадоў, крымінальныя справы завялі. Заварушка выгадна, зыходзячы з той логікі, што нас папракаюць. Напэўна, выгадна. Можам мы так разважаць - можам".

"Але сітуацыя вельмі небяспечная. Ізраіль - ядзерная краіна, мае ядзерную зброю, якую можа прымяніць. Іран - не падарунак (размова пра моц краіны, у тым ліку ваенную. - Заўвага). І калі ўспыхне - мала не здасца", - падкрэсліў беларускі лідар.

А далей, адзначыў Кіраўнік дзяржавы, могуць разгарэцца і іншыя рэгіянальныя канфлікты. "Можа ўспыхнуць уся планета. Таму вельмі небяспечная сітуацыя", - дадаў ён.

Тым не менш, Прэзідэнт запэўніў, што нават на фоне гэтых падзей у свеце ў Беларусі забяспечаць грамадзянам нармальнае жыццё.

Адказваючы на пытанне журналістаў наконт міжнароднай канферэнцыі ў Мінску на тэму еўразійскай бяспекі, Аляксандр Лукашэнка заявіў: "Гэта сігнал. Яны хочуць чуць, яны слухаюць. Яны фарміруюць нейкі парадак дня, асабліва еўрапейцы. Еўрапейцам вайна не патрэбна. Іх душыць Амерыка. Ну гэта таксама не бязмежна. Можна ж ламаць, крышыць на калена і зламаць. Таму еўрапейцаў вельмі шмат сюды прыехалі. Амерыканцы ўсё гэта бачаць, чуюць, падслухоўваюць і гэтак далей. Гэта сведчыць аб тым (прыезд многіх еўрапейцаў. - Заўвага), што яны шукаюць варыянты. Гэта добра".

Кіраўнік дзяржавы яшчэ раз нагадаў аб сваім тэзісе, што Еўрасаюз - гэта адна з апор у свеце. Але цяпер палітыка многіх краін ЕС знаходзіцца ў залежнасці ад ЗША, якія дзейнічаюць на аслабленне Еўрапейскага саюза. "Як толькі з'явілася еўра (гэта канкурэнт долару), яны пачалі даймаць гэту Еўропу", - адзначыў беларускі лідар.

Аляксандр Лукашэнка падкрэсліў, што калі б тэхналагічны Еўрасаюз аб'яднаў намаганні з багатай рэсурсамі Расіяй, то такому альянсу было б немагчыма процістаяць. Аднак амерыканцы такога дапусціць не могуць.

"Але яны да гэтага прыйдуць (краіны Еўропы і іх палітыкі. - Заўвага). Іх народы прымусяць. Вазьміце Славенію цяпер, Венгрыя займае асаблівую пазіцыю. Яны ўсё роўна прыйдуць да нас, у Расію яны прыйдуць, таму што там кладоўка (рэсурсаў і карысных выкапняў. - Заўвага). Як у Афрыцы, так і ў Расіі - кладоўка. І свет прырастаць будзе за кошт поўначы - Расіі - і за кошт Афрыкі. Таму яны сюды прыйдуць".

Кіраўніку дзяржавы было зададзена пытанне, ці гатовы ён сесці за стол перагавораў з сіламі Захаду, паціснуць адзін аднаму рукі і, галоўнае, паверыць у шчырасць намераў тых, хто ўжо як мінімум аднойчы выкарыстоўваў мірныя дамоўленасці ў Мінску, каб выйграць час і падрыхтаваць Украіну да вайны.

"Я нікому верыць не збіраюся. Калі б асабіста мой дом быў або я, то я верыў бы. Але каля 10 мільёнаў чалавек (жыхароў Беларусі. - Заўвага) - лёсы людзей, дзеці і іншае. Як я магу верыць? Факты на стол, як я часта гавару. Я павінен штосьці ў руках трымаць і прымаць нейкія рашэнні. Толькі практыка і ніякіх абяцанняў. Паціскаць рукі я ніколі не адмаўляюся. Я паціскаю рукі ўсім, хто з мірам прыходзіць, і хто за пазухай або ў гэтай руцэ не трымае камень. Калі ласка, мы гатовы ў гэтым напрамку працаваць", - заявіў беларускі лідар.

Аляксандр Лукашэнка нагадаў, што яшчэ на ўрачыстым сходзе ў гонар Дня Незалежнасці ён даў адпаведныя даручэнні Ураду: "Звяжыцеся, прапануйце. Маўчаць (прадстаўнікі іншага боку. - Заўвага). Ну, думаю, добра, выбары пройдуць (размова аб парламенцкіх выбарах у Польшчы, якія адбыліся 15 кастрычніка 2023 года. - Заўвага), паглядзім. Ну, прайшлі выбары - чакаем прапаноў".

"Але наступаць нам на грудзі каленам, націскаць і патрабаваць (недапушчальна. - Заўвага): "Гэтага адпусці, палітзняволеных, у вас сістэма не тая!" Ды бог з вамі! Вы сваю сістэму ў час выбараў паказалі. Да смешнага дайшлі з гэтым рэферэндумам вар'яты: "Будзем зносіць сцяну (узведзеную ў Польшчы на граніцы з Беларуссю. - Заўвага) або не будзем?" - адзначыў Прэзідэнт.

Аляксандр Лукашэнка пахваліў народ Польшчы, які паказаў сваю волю на праведзеных 15 кастрычніка парламенцкіх выбарах.

"Малайцы палякі. Вось я гэтага варыянта не чакаў. Яны проста не сталі ў такую гульню з гэтымі "пісаўцамі" гуляць (Правячая партыя "Партыя і справядлівасць" (ПіС), якая страціла большасць у парламенце. - Заўвага). Ну палякі, я вось хвалю народ Польшчы. Малайцы. Яны ўцёрлі ім нос. І апазіцыю да ўлады фактычна прывялі. Ужо Польшча будзе не тая. Няхай гэта не нашы людзі там (на чале ўлады. - Заўвага), не настроеныя з намі размаўляць, але гэта іншыя людзі. І палякі паказалі: рабіце так, як мы хочам, не будзеце рабіць, - і вас выкінем. Малайцы палякі!" - сказаў Кіраўнік дзяржавы.

Аляксандр Лукашэнка падкрэсліў, што Беларусь заўсёды працягвае суседзям руку і не кідае ў іх бок каменне: "Нашы суседзі - ад Бога, з імі трэба жыць".

"А тое, што яны робяць цяпер і на граніцы, і іншае, - гэта розуму недаступна. Але таксама ўжо Еўропа зразумела, што там за хабар забіралі і цягнулі ў Германію (мігрантаў. - Заўвага). Не Лукашэнка гэтых мігрантаў туды цягнуў, а яны, таму што яны на гэтым зарабляюць. Таму час пакажа, - сказаў Кіраўнік дзяржавы. - Там (у Літве. - Заўвага) хутка наогул людзей не будзе. Яны здзекуюцца з народа Літвы. Я бываў у Літве. Талковыя, моцныя такія людзі - памор'е. Што ж вы здзекуецеся з гэтых людзей? Літоўцы, латышы - нармальныя людзі. Не пашанцавала з кіраўнікамі, што тут гаварыць. Але гэта іх праблема. Я думаю, літоўцы, латышы ў бліжэйшы час на выбарах і гэту праблему вырашаць".

У час размовы з журналістамі Прэзідэнт заявіў, што Беларусь настроена на мір з усімі суседзямі і іншымі краінамі і не хоча ваяваць.

"Паціскаем рукі і будзем паціскаць тым, хто хоча жыць з намі ў міры. Мы ваяваць не хочам. Вы ведаеце, мы можам адказаць. У нас ёсць чым адказаць як ніколі", - сказаў Кіраўнік дзяржавы.

"Але мы не хочам ваяваць. Таму што гэты адказ дорага нам абыдзецца. Трэба разумець: у выпадку сутыкнення людзі загінуць і з таго, і з іншага боку. Таму мы ваяваць не хочам, мы хочам жыць мірна", - падкрэсліў Аляксандр Лукашэнка.

Размаўляючы з Кіраўніком дзяржавы, журналісты адзначылі, што практычна кожны дзень з тэрыторыі суседніх краін у Беларусь падкідваюць целы загінулых бежанцаў. Беларускія спецыялісты праводзяць неабходныя следчыя мерапрыемствы, устанаўліваюцца асобы загінулых.

"Не толькі кожны дзень, а па некалькі разоў на дзень падкідваюць трупы. І трупы, і паламаных, і пераламаных. Я папрасіў прэс-сакратара: не трэба нічога ўтойваць. Пакажыце, што яны робяць: з пераламанымі нагамі людзі, а тое і наогул трупы валяюцца на паласе. Вось узялі адкрылі і выкінулі. У нас гэтыя кадры ёсць. Трэба гэтаму "цывілізаванаму" свету паказваць, які там "райскі сад", - падкрэсліў Аляксандр Лукашэнка.

Пры гэтым Кіраўнік дзяржавы заўважыў, што міжнародная супольнасць бачыць гэту праблему, але гаворыць пра яе толькі тады, калі гэта ёй выгадна. "Тое, што ім выгадна, у любую ідэалагічную абалонку будуць укараняць. Тое, што ім не выгадна, яны рабіць не будуць. Ім гэта не выгадна. Праўда, малайцы немцы. Яны ўсё больш і больш пачынаюць абурацца", - звярнуў увагу Прэзідэнт.

Аляксандр Лукашэнка расказаў, што беларускі бок па пэўных каналах абмяркоўвае з немцамі праблему міграцыі. "Ацэнка такая, як у нас: палякі - нягоднікі. Асабліва, што перакідваюць мігрантаў і забіваюць людзей. Мяне гэта ніколькі не здзіўляе. З іх пазіцыі так і павінна быць. Кажуць яны адно, а робяць другое. Для іх гэта норма. Яны нягоднікі, крыжакі. У гісторыі заўсёды было так", - заўважыў Кіраўнік дзяржавы.

Прэзідэнт нагадаў, як развівалася сітуацыя з бежанцамі на граніцы. Спачатку Беларусь дапамагала Еўрапейскаму саюзу абараняць яго знешнія рубяжы. Бакі рэалізоўвалі сумесныя праекты па міграцыі. Але калі Еўрасаюз увёў санкцыі і пачаў эканамічную вайну супраць Беларусі, Кіраўнік дзяржавы адразу папярэдзіў: Беларусь больш не будзе дапамагаць ЕС у барацьбе з нелегальнай міграцыяй.

Міграцыйную праблематыку Аляксандр Лукашэнка абмяркоўваў і на нядаўняй сустрэчы з Міністрам замежных спраў і знешняга гандлю Венгрыі Петэрам Сіярта. І венгерскі палітык падтрымаў пазіцыю Беларусі.

"Наша пазіцыя светлая і зразумелая: мы не адстойнік. Мы нікога тут лавіць не будзем. Тым больш вы іх паклікалі. Хай ідуць", - сказаў Аляксандр Лукашэнка.

Разам з тым ён лічыць недапушчальнымі дзеянні еўрапейскіх суседзяў, якія забіваюць бежанцаў і перакідваюць іх на беларускую тэрыторыю або закопваюць каля сваёй граніцы.

"Гэта варвары. Яны ніколі не ставіліся добра да нас і не ставяцца. Мы ім верылі. А калі не верылі, ішлі заўсёды насустрач, працягвалі руку. І мы, і рускія, і тыя ж украінцы. Па-славянску. А яны ў нас кідалі каменне. Але мы гатовы пераступіць праз гэта. Трэба глядзець наперад. Праз гэта трэба ўмець пераступіць і ісці наперад, дамаўляцца. Мы да гэтага гатовы, - падкрэсліў Прэзідэнт. - А калі паглядзець на працэс міграцыі, то трэба сказаць, што ў нас тут "кветачкі". Праз Міжземнае мора цяпер заварушка, і яшчэ больш хлыне мігрантаў. Таму хутка будзе не да Беларусі. Адтуль пачнуць падаграваць. Аб гэтым мне Міністр замежных спраў Венгрыі ўчора сказаў".

Не абмінулі журналісты і тэму аховы здароўя. Аляксандр Лукашэнка нагадаў, што ў краіне працуе вялікая міжведамасная рабочая група па праверцы сістэмы аховы здароўя. Гэта падштурхоўвае сістэму і ўстановы выпраўляць памылкі ў сваёй дзейнасці.

"Мне здаецца, што да канца года мы шмат зробім у ахове здароўя. Гэты штуршок даў свой вынік. Прынамсі, ФАПы, участковыя бальніцы, сястрынскага догляду, раённыя бальніцы мы ўзварухнулі сур'ёзна. Яны шмат што зрабілі", - адзначыў Аляксандр Лукашэнка.

Гаворачы, у прыватнасці, пра работу фельчарска-акушэрскіх пунктаў, Прэзідэнт падкрэсліў, што не трэба імкнуцца іх закрываць. Аднак і ў невялікай вёсцы на некалькі дамоў трымаць ФАП няма сэнсу. "Трэба моцны ФАП у аграгарадку. 1400 аграгарадкоў - там павінен быць добры ФАП. Да лячэння людзей, абароны людзей, дапамогі людзям павінны заўсёды быць падключаны нават не сельскія Саветы, а кіраўнік сельгаспрадпрыемства. Чаму я падтрымліваю калгасы, саўгасы цяперашнія? Таму што яны глядзяць за пенсіянерамі, хворымі. Яны школе дапамогуць, дзіцячаму саду. Усім дапамагаюць, дзе могуць. Дзе гэта забылі, мы гэта цяпер аднаўляем", - сказаў Кіраўнік дзяржавы.

Аляксандр Лукашэнка таксама закрануў пытанні пратэзавання. Раней Прэзідэнт даручаў разабрацца з чэргамі на аперацыі. "З Гомеля была інфармацыя: гавораць, што напалавіну знялі чэргі. Знайшлі пратэзы, уставілі людзям. Вялікая справа, - адзначыў ён. - І так па ўсіх напрамках".

"Так, у нас недзе не хапае ўрачоў. Некаторыя ўрачы збеглі са сваёй прафесіі і чорт ведае чым займаюцца. З часам мы і гэту праблему вырашым. Ёсць у мяне варыянты. Ты ўрач - ідзі працуй. Не - кладзі дыплом. Не хочуць: шэсць гадоў і дыплом кінуць. Ніхто не хоча. Дык калі ты не працуеш, які ты дыпламаваны ўрач? Гэта значыць парадак трэба навесці. Хапае ў нас спецыялістаў, яшчэ і іншым дапаможам. У Афрыку паляцім у хуткім часе: там нас чакаюць, моляцца на нас. Ужо групы туды з'ездзілі, паказалі, дзе што мы можам зрабіць, чым можам дапамагчы", - заявіў беларускі лідар.

"Ахову здароўя трэба прыводзіць да розуму. Ад студэнта (і можа, са школы, каб ведалі, куды ідуць) да работы з бальніцы. Недзе пасля Новага года я планую да гэтага пытання вярнуцца. Абавязкова вярнуцца да гэтага", - сказаў Кіраўнік дзяржавы.

Падобным чынам у Беларусі нядаўна ўзварухнулі і сістэму адукацыі, нагадаў Аляксандр Лукашэнка. "Калі я не прыняў даклад Міністра, заварушыліся таксама і парадачак навялі", - дадаў ён.